Сүхбаатар дүүрэг дэхь цагдаагийн 1,2 дугаар хэлтэс, Сүхбаатар дүүргийн прокурорын газар 2019 онд хийгдсэн ажил болон хэрэгжүүлсэн аяны хүрээнд гарсан үр дүнгээ танилцууллаа.

Сүхбаатар дүүргийн хувьд 2019 онд гэр бүлийн хүчирхийлэлтэй тэмцэх, урьдчилан сэргийлэх ажлыг эрчимжүүлэх зорилгоор Сүхбаатар дүүргийн шүүх, прокурор, цагдаагийн байгууллагын уялдаа холбоог бэхжүүлэх нь сэдэвт сургалт хэлэлцүүлгийг зохион байгуулж хэлэлцүүлгээс гаргасан зөвлөмжийг ханган ажилласнаар гэр бүлийн хүчирхийллийн улмаас үйлдэгдсэн гэмт хэрэг 46 хувиар буурсан аж. Дүүргийн гэмт хэргээс урьдчилан сэргийлэх салбар зөвлөлтэй хамтран ЕБС болон их дээд сургуультай байгуулсан гурвалсан гэрээний хэрэгжилтийг шалгаж гэмт хэргээс урьдчилан сэргийлэх өдөрлөгийг нийслэлийн хэмжээнд анх удаа зохион байгуулж, гэрээний үүргээ сайн биелүүлсэн ЕБС, их, дээд сургуулийг нийт 20 сая төгрөгөөр шагнаж, нийгмийн идэвхийг нэмэгдүүлэх чиглэлээр онцгой анхаарч ажилласан байна. Гэрээний хүрээнд сургуулийг орчинг аюулгүй болгох зорилгоор камержуулах, гэрэлтүүлэг нэмэх, 729 төрлийн 320 сая төгрөгийн бүтээн байгуулалтын ажил хийгдсэн байна. 

Мөн “Зогс! Шалга хулгайчид боломж бүү олго”,”Нэг цохилт хоёр амьдрал сүйтгэнэ” гэм мэт аян амжилттай хэрэгжүүлсэн. Эрүүл, аюулгүй нийгмийн төлөө хамтдаа төслийн хүрээнд байгаль орчноо хамгаалах, ой хээрийн гал түймэр, хууль бусаар мод бэлтгэх болон мансууруулах эм, сэтгэцэд нөлөөт бодисын хэрэглээг хянах зэрэг үйл ажиллагаа явуулжээ. Мөн жилдээ 600 байсан залилах гэмт хэрэг 2019 онд 4600 болж өссөнтэй холбогдуулан “Ятгах тусам нягтал” аяныг хэрэгжүүлж эхлээд байна.

Цагдаагийн 1, 2 дугаар хэлтсийн Нийтийн хэв журмыг хамгаалах тасаг нь нийт 13422 өргөдөл гомдол хүлээн авч, 3739 буюу 27,8 хувьд нь зөрчлийн хэрэг нээж, 86 буюу 0,6 хувийг ердийн журмаар шийдвэрлэн, 9473 буюу 70,5 хувийг зөрчлийн хэрэг нээхээс татгалзах саналтай прокурорт хүргүүлэн шийдвэрүүлж, 13308 буюу нийт хэргийн 99 хувийг шийдвэрлэж ажиллажээ.