Мөнгө угаахтай тэмцэх, санхүүгийн хориг арга хэмжээ авах байгууллага буюу (ФАТФ)-ын саарал жагсаалтаас гарахын тулд зарим хуульд өөрчлөлт оруулах шаардлагатай болсон. Тиймээс Мөнгө угаах болон терроризмыг санхүүжүүлэхтэй тэмцэх тухай хуульд нэмэлт, өөрчлөлт оруулах тухай, Нягтлан бодох бүртгэлийн тухай, Санхүүгийн зохицуулах хорооны эрх зүйн байдлын тухай хуульд нэмэлт оруулах тухай, Эрүүгийн хуульд нэмэлт, өөрчлөлт оруулах тухай хуулийн төслүүд болон эдгээр төслүүдтэй холбогдуулан боловсруулсан бусад хуулийн төслийг УИХ-д өргөн бариад байгаа юм. 

Эрүүгийн хуульд "Татвар төлөгч хувь хүн, хуулийн этгээдийн удирдах, гүйцэтгэх албан тушаалтан татвар төлөхөөс зайлсхийх зорилгоор 300 мянган нэгжтэй тэнцэх хэмжээний төгрөг, түүнээс дээш хэмжээний татвар ногдох орлого, эд хөрөнгө, бараа үйлчилгээг зориуд худал тодорхойлсон, нуусан бол 5400-27000 нэгжтэй тэнцэх хэмжээний төгрөгөөр торгох, эсхүл 1-5 жил хүртэл хугацаагаар зорчих эрхийг хязгаарлах ял шийтгэнэ" гэсэн заалт шинээр оруулахаар болжээ.

Энэ гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн бол хуулийн этгээдийг 20000-120000 нэгжтэй тэнцэх хэмжээний төгрөгөөр торгох ял шийтгэх юм байна. Нэг нэгж нь 1000 төгрөгтэй тэнцдэг юм.