-НЭГ НАС ГУРВАН САРТАЙ ДҮҮГИЙНХ НЬ БИЕИЙН БАЙДАЛ МУУ БАЙНА-

Өнгөрөгч баасан гарагт буюу арванхоёр дугаар сарын 20-ны өдөр хоёр настай болон нэг настай ах дүү хоёр хойд эцгийнхээ гарт шөнөжин зодуулсан аймшигт хэрэг гарсан. Гэмт этгээд ахыг нь зодож амь насыг нь хохироосон бөгөөд  тэрээр /хоёр настай хүү болох М.С/ 12 сарын 21-ний өглөөний 7 цагт амьсгал хураажээ.

Харин нэг настай дүүг нь дуудлагын дагуу цагдаа нар ирж эмнэлэг яаралтай хүргэгдсэн байна. Одоогоор нэг настай хүүхдийн биеийн байдал маш хүнд аймгийн эмнэлэгт эмчилгээ хийлгэж байгаа гэнэ.

Ах дүү хоёр ээжийнхээ хамтаар Хэнтий аймгийн Хэрлэн сумын дөрөвдүгээр багт амьдардаг байсан бөгөөд тэдний ээж нь ял эдэлж байгаад өнгөрсөн есдүгээр сард хорих ангиас суллагдсан этгээдтэй хамтран амьдрах болжээ. Улмаар тухайн хэрэг гарсан өдөр нь ээж нь хамтран амьдрагчийн хамтаар согтууруулах ундааны зүйл хэтрүүлэн хэрэглэсэн байсан талаар хэвлэл мэдээллийн хэрэгслээр гарчээ.

Хэрэг гарсан өдөр хүүгийн ээж хамтран амьдрагч болох гэмт хэрэг үйлдсэн сэжигтэн этгээдтэй маргалдсан  байна. Харин сэжигтэн этгээд уурандаа ах дүү хоёрыг ийнхүү зодож, ахынх нь аминд хүрч дүүг нь хүнд гэмтээжээ.

Хэнтий аймгийн цагдаагийн байгууллагаас бага насны хүүхдийг биеэ хамгаалах чадваргүйг нь мэдсээр байж харгис хэрцгий аргаар зодож амь насыг нь хохироосон сэжигтэн этгээдийг цагдан хорьжээ. Хэргийн газарт ажилласан шинжээч нарын дүгнэлтээр талийгаач хоёр настай хүү болон М.С –ийн элэг бяцарсны улмаас нас барсан гэсэн урьдчилсан байдлаар дүгнэсэн байна. Үргэлжлүүлэн Хэнтий аймгийн цагдаагийн газарт хэргийг мөрдөн шалгаж байна.