Үндэсний хөгжмийн урлаг дэлхийн рок сонирхогчдыг байлдан дагуулж буйг бид улс даяараа бахархан үзлээ. Монгол үндэсний урлагт нээгдээгүй олон боломж байгааг үнэлж Монгол Улсын Ерөнхийлөгч Б.Баттулга “The Hu” хамтлагт “Чингисийн одон”-г зүүж өгсөн нь саяхан.

Тэгвэл Дэлхийн дүрслэх урлагийн ертөнцөд Монгол зураг дэлхийг байлдан дагуулахад бэлэн болжээ. Монгол зургийн гайхамшиг нь юунд оршдог вэ гэвэл, ямар ч орон зай, цаг хугацааг нэгэн хавтгай дээр зэрэг дүрсэлж, боломжгүйг бий болгодогт оршино.

Үүнийг алдарт Марзан Шарав “Монголын нэг өдөр” гэдэг бүтээлээрээ харуулсан. Үүнээс бараг 100 жилийн дараа Н.Сэргэлэн тэргүүтэй зураачдын бүтээсэн “Дэлхийн нэг өдөр” хэмээх бүтээл нь дэлхийн улс орнуудыг тив, тивээр нь ахуй амьдралын өнгө төрх, амьтан ургамал болон байгалийн өвөрмөц тогтоц, тухайн улс үндэстний зан заншил, соёл, үнэт зүйлс, дэлхийд гайхагдсан бүтээн байгуулалтыг нь нэгэн хавтгайд багтааж, томоохон орон зайг хураангуйлан, таван мянга гаруй дүр дүрслэлийг шигтгэн зурснаараа онцлогтой аж.

Энэхүү бүтээлийг 12 жилийн турш урласан бөгөөд овор хэмжээний хувьд урд хожид байгаагүй Монгол зургийн анхны том хэмжээтэй дүрслэх урлагийн бүтээл юм.

Энэхүү бүтээл Монголчууддаа зориулж урчуудын эвлэлийн үзэсгэлэнгийн танхимд энэ сарын 22-24ны өдрүүдэд дэлгэгдээд цаашдаа дэлхийг тойрох зорилготой аж.