Сүүлийн өдрүүдэд нийгмийн цахим сүлжээгээр “Үндэсний статистикийн хорооноос 5000₮ нэгжтэй гурван минутын судалгаа. Нийт 60 асуулттай” гэх үндэслэлгүй, ташаа мэдээлэл тархаад байна.

Үндэсний статистикийн хорооноос энэхүү судалгааг ЗОХИОН БАЙГУУЛААГҮЙ бөгөөд одоогоор Улаанбаатар хотод Байшин, орон сууцны тооллого, Өрхийн нийгэм, эдийн засгийн судалгаа, Ажиллах хүчний судалгаа, Цаг ашиглалтын судалгааг явуулж байна.

Монгол Улсын Хүн ам, орон сууцны Улсын ээлжит тооллого 2020 оны нэгдүгээр сарын 9-нөөс 15-ны хооронд орон даяар нэгэн зэрэг явагдана.

Хүн ам, орон сууцны тооллогын тухай хуулийн 8.3-т заасны дагуу ээлжит тооллогыг товлосон өдрөөс эхлэн долоо хоногт багтаан явуулахаар заасан байдаг. Уг заалтын дагуу Хүн ам, орон сууцны Улсын ээлжит тооллогыг 2020 оны нэгдүгээр сарын хоёр дахь долоо хоног буюу 9-нөөс 15-ны өдрийн 22.00 цаг хүртэл мэдээлэл цуглуулалтыг явуулах юм. Тус тооллогын үндсэн үр дүнг 2020 оны 6 дугаар сарын эхээр танилцуулна гэж Үндэсний статистикийн хорооноос мэдээллээ.