Ховд аймгийн ДЦС-ын захирлыг барьцаалан НЭГ ТЭРБУМ төгрөг нэхжээ
Ховд аймгийн төв Жаргалант суманд энэ сарын 19-ний өдөр хүн барьцаалж, дээрэмдэх зорилгоор бүлэг этгээдүүд хутга тулган авч явсан онц ноцтой гэмт хэрэг үйлдэгдсэн байдаг.
Эх сурвалжийн мэдээлж буйгаар, гэмт этгээдүүд хохирогчоос нэг тэрбум төгрөг нэхсэн бөгөөд барьцаалан авч явж байхдаа алтан картнаас нь их хэмжээний мөнгө гарган авсан аж.
Мөн гэмт этгээдүүд бүгд БНСУ-ын виз гаргуулсан байсан ба хил гарч явах гэж байжээ.
Дээрх хэргийг хохирогчийн ар гэрийнхэн автомашинтайгаа сураггүй алга боллоо гэх мэдээллийн мөрөөр Ховд аймгийн цагдаагийн газрын алба хаагчид шуурхай эрэн хайснаар Завхан аймгийн нутагт явж байхад нь илрүүлэн баривчилсан байдаг.
Тодруулбал, сарын 19-ний өдөр 08.00 цагийн үед бусдад хутга тулган барьцаалж, авч зугтан, их хэмжээний мөнгө нэхэж дарамталсан. Тодруулбал, Ховд аймгийн ДЦС-ын дарга С-ийг 2000 онд төрсөн хоёр этгээд, 2001 онд төрсөн нэг, 1964 онд төрсөн нэг этгээдийн хамтаар барьцаалж, хутгалан, хохирогчийн автомашин ашиглан авч зугтжээ.
Мөрдөн шалгах ажиллагаагаар зохион байгуулалттайгаар бүлэглэн хүн барьцаалан их хэмжээний мөнгө нэхсэн этгээдүүд Хэнтий аймгийн харъяалалтай хүмүүс байсан нь тогтоогдсон. Харин насны хувьд хамгийн анхаарал татаж байгаа нь 17-19 насны гурав, 55 настай нэг этгээд бүлэглэн уг хэргийг үйлдсэн байдаг.
Ингэхдээ тэд Хэнтий аймгаас Ховд аймгийн зорьж очоод өглөөгүүр хохирогч болох Ховд аймгийн Хар тарвагатайн нүүрсний уурхай, Ховд аймгийн “Бадамлах дөл” дулааны станцын захиралын албан тушаалтай Ш-ийг барьцаалан авч одсон байгаа юм.
Хохирогчийг өөрийнх нь унаж явсан автомашинд нь суулган Ховдоос гарч Увс аймаг ороод, тэндээсээ Завхан аймгийн Сонгино суманд явж байхад нь барьсан билээ. Гэмт этгээдүүдийг илрүүлэх үед хохирогч нь биедээ олон тооны шархтай гэмтэл учирсан байсан тул ГССҮТ-д эмчлүүлэхээр явсан аж.
Дээрх гэмт этгээдүүдийг Ховд аймгийн 457 дугаар цагдан хорих ангид саатуулан мөрдөн байцаалт явуулж байна.