Бүртгэлтэй ажилгүй иргэдийн 56.6 хувь нь 15-34 насны ЗАЛУУЧУУД байна
Монгол Улсын нийгэм, эдийн засгийн энэ оны эхний 9 сарын байдлаарх статистик дүнг Үндэсний Статистикийн хорооноос өнөөдөр мэдээллээ.
Аймаг, нийслэлийн Хөдөлмөр эрхлэлтийн байгууллагад энэ оны эхний 9 сард ажилгүй 58.7 мянган иргэн бүртгүүлээд байна. Харин бүртгэлтэй байсан иргэдээс 15.5 мянга нь ажилд зуучлагдан ороод байна. Нөгөө талаар бүртгэлтэй байсан 47.8 мянган иргэн ажил идэвхтэй хайхгүй байгаа шалтгаанаар бүртгэлээс хасагдаад байна.
Өмнөх оны мөн үеэс шинээр бүртгүүлсэн ажилгүй иргэдийн тоо 6.1 мянгаар, ажил идэвхтэй хайхгүй байгаа шалтгаанаар бүртгэлээс хасагдсан иргэд 3.4 мянгаар буурч, ажилд зуучлуулсан иргэд 622 хүнээр буюу 4.2 хувиар өссөн байна.
Хөдөлмөр эрхлэлтийн байгууллагад ажил хайж бүртгүүлсэн иргэд өнгөрсөн сарын эцэст 30.4 мянга болоод байна. Үүнээс 20.4 мянган бүртгэлтэй ажилгүй иргэд, 10 мянга нь ажилтай боловч өөр ажил хайж байгаа иргэд байна.
Манай улсад гадаадын 10.4 мянга иргэн хөдөлмөрийн гэрээгээр ажиллаж байна. Ажил эрхэлж буй гадаадын иргэдийн тоо 648 хүнээр буюу 6.7 хувиар өсжээ.
Эх сурвалж: ҮСХ
|