“Амар Амгалан-1” 93 айлын орон сууцыг барьсан “Нарны хүү, сарны охин” компани хоёр жилийн өмнө урьдчилгаа мөнгө төлж, захиалга өгсөн иргэд хохирч буй тул тусламж хүсэж,  өнөөдөо мэдээлэл хийлээ. 

Тус байранд анх захиалга авахдаа “Нарны хүү, сарны охин” компанийн захирал Д.Гүрсоронз урьдчилгаа 10-20% төлөх боломжтой, орлого нотлох шаардлагагүй, банкны зээлтэй байж болох бөгөөд нэг ам.метрийг нь 1,250,000 төгрөгөөр зарна гэгчлэн “Монгол HD” телевизийн “Өнөө өглөө” хөтөлбөрөөр ипотекийн 5%-ийн зээлийн төслийг хэрэгжүүлэх тухайгаа ярьжээ. Тухайн үед ипотекийн 8%-ийн зээл зогссон байсан тул иргэд тус компанийг сонгосон тухай хохирсон иргэд хэлж байна.

Гэвч “Амар Амгалан-1” орон сууц ашиглалтад орчихоод байгаа ч анх захиалга өгсөн иргэд нь байрандаа орж чадахгүй хохироод байгаа аж. Учир нь захиалга өгсөн иргэдийн байрыг нэг ам.метрийг нь 1,850,000 төгрөгөөр өөр хүмүүс зарах болжээ. 

Хоёр жилийн өмнө 10-20 сая төгрөгийн урьдчилгаа өгөөд байрандаа орж чадаагүй 15 айл ийнхүү нэгдсэнээс гадна гэрээгээ цуцалсан хэрнээ мөнгөө аваагүй 20 гаруй айл байгаа гэнэ.