Энэ долоо хоногт /2019.08.26-2019.08.31/  Цагдаагийн байгууллагаас олон нийт рүү чиглэсэн ОНЦЛОХ үйл явдлыг тоймлон хүргэж байна. 

“Цахим гэрч” системийн туршилтын үр дүнгийн талаар санал солилцлоо

Цагдаагийн ерөнхий газрын Тэргүүн дэд дарга, цагдаагийн хурандаа Р.Отгонжаргал 2019.08.30-ны өдөр Интерполын “Цахим гэрч” системийн  туршилтыг зохион байгуулах зорилгоор Цагдаагийн ерөнхий газарт 2019 оны 08 дугаар сарын 25-наас 30-ны өдрүүдэд ажилласан Интерполын Ерөнхий нарийн бичгийн даргын газрын Оргодол этгээдийг эрэн сурвалжлах ажиллагаанд дэмжлэг үзүүлэх газрын ахлах мэргэжилтэн Мариос Анастасиг хүлээн авч уулзан, туршилтын үр дүнгийн талаар харилцан санал солилцлоо.

Уулзалтын үеэр Цагдаагийн ерөнхий газрын Тэргүүн дэд дарга, цагдаагийн хурандаа Р.Отгонжаргал Ази тивийн улс орнуудаас Монгол Улсыг сонгон авч энэхүү шинэлэг чухал системийн туршилтыг хамтран хэрэгжүүлсэн явдалд Олон улсын эрүүгийн цагдаагийн байгууллага-Интерполд талархал илэрхийлэв.

“Мөнгө угаах, санхүүгийн гэмт хэрэгтэй тэмцэх” сэдэвт сургалт амжилттай зохион байгуулагдлаа

Цагдаагийн ерөнхий газраас Америкийн Нэгдсэн Улсын Элчин сайдын яам болон Холбооны мөрдөх товчоотой хамтран 2019 оны 08 дугаар сарын 26-30-ны өдрүүдэд “Мөнгө угаах, санхүүгийн гэмт хэрэгтэй тэмцэх” сэдэвт сургалтыг амжилттай зохион байгууллаа.

Тус сургалтад хамрагдсан Цагдаагийн ерөнхий газар, Авлигатай тэмцэх газар, Монголбанкны Санхүүгийн мэдээллийн алба, Улсын Ерөнхий прокурорын газар, Тагнуулын ерөнхий газар, Дотоод хэргийн их сургуулийн алба хаагч, ажилтнуудад сертификат гардуулах үйл ажиллагааг зохион байгуулсан юм.

ЦЕГ-ын Санхүү, аж ахуйн албаны хамт олон хүүхдүүдэд хичээлийн хэрэгсэл гардууллаа

ЦЕГ-ын  Санхүү, аж ахуйн албаны  түүхт 80 жилийн ой 10 дугаар сарын 04-ний өдөр тохионо. Ойн хүрээнд тус албанаас Цагдаа, дотоодын цэргийн байгууллагын үйл ажиллагаанд хэрэгцээ, шаардлагатай 80 бүтээлч ажлыг төлөвлөн, гүйцэтгэж байна. Тус арга хэмжээний хүрээнд 2019 оны 8 дугаар сарын 29-ны өдөр  хичээлийн шинэ жилийг тохиолдуулан олон хүүхэдтэй, өрх толгойлсон, туслалцаа шаардлагатай алба хаагчдынхаа хүүхдүүдэд иж бүрэн хичээлийн хэрэгслийг гардуулан өглөө. Санхүү, аж ахуйн албанаас нийгмийн хариуцлагаа ухамсарлан алба хаагчид руугаа чиглэсэн олон талын ажлыг хийж хэрэгжүүлдэг.

Сургуулиудад оюутан цагдаа, хүүхэд хамгаалагч, цагдаагийн авто болон явган эргүүлүүдийг ажиллуулна 

"2019-2020 оны хичээлийн шинэ жил" нэгдсэн арга хэмжээ буюу хичээлийн шинэ эхлэж буйтай холбогдуулан цагдаагийн байгууллагаас гэмт хэрэг, зөрчлөөс урьдчилан сэргийлэх чиглэлээр хэвлэлийн бага хурал хийлээ.

Хүүхдийг зам тээврийн ослоос урьдчилан сэргийлэх ажлын хүрээнд Цагдаагийн болон Боловсролын байгууллагаас олон талт арга хэмжээг системтэйгээр авч хэрэгжүүлж байгаа аж. Гэрээгээр багш, захирал, эцэг эхчүүд хуулинд нийцсэн тодорхой төрлийн үүрэг, эрхүүдийг хүлээсэн, гэрээний хэрэгжилтэд цагдаагийн байгууллага хяналт тавин оролцоно гэв. Мөн хичээлийн шинэ жилийн үеэр халаасны хулгай тэр дундаа гар утасны дээрэм, хулгай ихэсдэг. Тиймээс хүүхдэдээ үнэтэй, ухаалаг гар утас хэрэглүүлэхгүй, авч өгөхгүй байхыг анхаарууллаа. 

Цагдаагийн байгууллагын ажил үйлчилгээг ИРГЭДЭД ойртуулахаар ДҮҮРЭГ, ХОРООДОД 16 хэсгийг шинээр байгууллаа

Монгол Улсын Засаг захиргаа, нутаг дэвсгэрийн нэгж түүний удирдлагын тухай хуулийн 7 дугаар зүйлийн 7.1 дэх хэсгийг үндэслэн, Цагдаагийн албаны тухай хуулийн 6 дугаар зүйлийн 6.1 дэх заалт “Цагдаагийн байгууллага нь цагдаагийн төв байгууллага, түүний харьяа алба, нэгж, нутаг дэвсгэр хариуцсан цагдаагийн байгууллагаас бүрдэнэ”-ийг баримтлан Цагдаагийн Ерөнхий Газрын даргын 2019 оны 08 дугаар сарын 27-ны өдрийн А/194 тоот тушаалаар Нийслэлийн цагдаагийн газрын бүтцэд өөрчлөлт оруулж нийслэлийн 6 дүүрэгт “Цагдаагийн газар”, хороодод 17 хэсэг дээр нэмж 16 хэсгийг шинээр байгууллаа.

Ингэснээр дүүрэг дэх цагдаагийн хэлтсүүдийн үйл ажиллагааг төвлөрүүлж, нэгдсэн удирдлагаар ханган тухайн дүүргийн Иргэдийн Төлөөлөгчдийн Хурал, Засаг даргатай нэг бодлогоор харилцаж, хамтран ажиллах нөхцөл бүрдэх юм.

Дүүргүүдийн цагдаагийн хэлтсүүдийг нэгдсэн зохион байгуулалтад орууллаа

Цагдаагийн ерөнхий газрын даргын дэргэдэх зөвлөл 2019.08.27-ны өдөр хуралдаж, нийслэлийн дүүргүүд дэх цагдаагийн хэлтсүүдийг нутаг дэвсгэрийнх нь харьяаллаар нэгдсэн удирдлага, зохион байгуулалтад оруулж, нэгж дээрх орон тоог нэмэгдүүлэх шийдвэр гаргалаа.

Цагдаагийн байгууллагаас иргэдэд үзүүлэх үйлчилгээний хүртээмж, шуурхай байдлыг хангах, алба хаагчдын ажлын ачааллыг тэнцвэржүүлэх, гэмт хэрэгтэй тэмцэх, нийтийн хэв журам хамгаалах үндсэн чиг үүрэг бүхий нэгж дээр ажиллаж байгаа алба хаагчдын орон тоог нэмэгдүүлэх чиглэлээр Цагдаагийн ерөнхий газар, Нийслэлийн цагдаагийн газрын удирдлагын бүтцээс 52 орон тоог дүүргүүдэд шилжүүлж, хороодод цагдаагийн 16 хэсгийг шинээр байгуулж хэсэг дээр эрүүгийн мөрдөгч, мөрдөгч нарыг тогтмол ажиллуулахаар бүтэц зохион байгуулалтын өөрчлөлтийг хийжээ.

Ж.Амгалан: Зөрчлийн тухай хууль нь өнөөгийн нийгэмд ДЭГ ЖУРМЫГ тулгуур мөн

Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалантай ярилцлаа. Зөрчлийн тухай хуулийг  нийгмээрээ зөрчихгүй байвал  амар амгалан, айх аюулгүй тайван амьдарна. Хэрэв ийм хууль үгүй бол энэ нийгэм чинь зэрлэг хүн сүрэг гэдэг шиг юм болно шүү дээ. Хэн хэнийгээ эрхэд халдахгүй нийгэмшиж зөв амьдрахад энэ хууль шаардлагатай. Ач холбогдол нь үүнд л оршиж байна. Дотор нь төрөлжсөн салбарласан нарийн юм бий.  Хуулийг хүн л хийдэг хойно зарим нэг нь хүндэдсэн, нэг талаараа хөнгөдсөн зүйл байна л даа. Гэхдээ Зөрчлийн тухай хуулийг бүхэлд нь хэрэгцээгүй хууль гэж болохгүй. 28 төрийн байгууллага хэвийн үйл ажиллагаагаа хангахын тулд энэ хуулийг мөрдөж байгаа. Засч залруулах юм байгаа л байх.

Э.Бөхбат: Дрифтэлж байсан машин онхолдохдоо бичлэг хийж зогссон охидыг дайрчээ

Баянзүрх дүүргийн нутаг дэвсгэр Дүнжингаравын зүүн урд замд өнгөрсөн шөнө буюу 29-ны шөнийн 03 цаг орчим Субару импреза маркийн автомашин онхолдож 2 эмэгтэй, 1 эрэгтэй нас барсан ноцтой осол хэрэг гарсан талаар өмнө бид мэдээлсэн.

Энэ талаар Тээврийн цагдаагийн албаны Урьдчилан сэргийлэх хэлтсийн дарга, цагдаагийн хурандаа Э.Бөхбат "Хэрэг мөрдөн шалгах ажиллагаа явагдаж байгаа учраас дэлгэрэнгүй мэдээлэл өгөх боломжгүй. Урьд шөнө гарсан ноцтой ослын улмаас 18, 22 насны хоёр эмэгтэй, нэг эрэгтэй нас барсан.  Амьд үлдсэн нэг хүний өгсөн мэдээллээр хоёр эмэгтэй нь бичлэг хийж байсан гэсэн. 
Сүүлийн жилүүдэд Fast furious, Speed зэрэг кинонуудыг ямар ч цензургүйгээр телевизээр үзүүлж байгаа нь хүүхэд залуучуудад машинаар ингэж хурдтай давхиж болдог юм байна гэсэн сэдлийг өгч байна. Уг киног мэргэжлийн жолооч нар тусгай зам дээр, аюулгүй байдлыг дээд зэргээр хангасан нөхцөлд хосолсон зураг авалтаар хийдэг. Гэтэл манай залуучууд өөрсдийнхөө унаж яваа машинаар зориулалтын бус зам дээр шөнийн цагаар хурдтай давхиж байгаагаас үүдэн осолдох тохиолдол гарсаар байна. Залуучууд та бүхэн шөнийн цагаар хурд хэтрүүлэх давхиж өөрсдийгөө болон бусдын амь нас эрүүл мэндэд ноцтой аюул учруулахгүй байхыг анхааруулж байна." гэв.

Дэлхийн “Цагдаа, галын 22 дугаар олимп”-ийн тоглолтод амжилттай оролцсон алба хаагчдыг шагнаж, урамшууллаа

БНХАУ-ын Сычуань мужийн Чеэндү хотод 2019.08.08-18-ны өдрүүдэд Дэлхийн цагдаа, галын олимп “Нэг үүрэг, нэг мөрөөдөл” уриан дор зохион байгуулагдаж, 96 орны 9870 орчим тамирчид спортын 68 төрлөөр өрсөлдөж шилдгүүдээ тодрууллаа. Энэхүү тэмцээнд Монгол улсын цагдаа, дотоодын цэргийн байгууллагыг төлөөлөн спортын 9 төрөлд 21 тамирчин оролцож алтан медаль-9, мөнгөн медаль-17, хүрэл медаль-4 хүртсэн амжилттай эх орондоо ирлээ.

Тус тэмцээнд амжилттай оролцсон алба хаагчдыг Цагдаагийн ерөнхий газрын дэд дарга, цагдаагийн хурандаа Ж.Болд, Захиргааны удирдлагын газрын дарга, цагдаагийн хурандаа Б.Бат-Өлзий нар хүлээн авч шагнал гардуулах ёслолын ажиллагаа 2019.08.27-ны өдөр Цагдаагийн ерөнхий газрын “Хүндэтгэлийн тэнхим”-д боллоо.

Инфографик:Цохилохоо больсон 366 зүрх

Орон нутгийн замд явахад ХУРДАА ХАС, ХУРД-ҮХЭЛ, ТАНЫ АМЬДРАЛ ТАНЫ ГАРТ гэх самбарууд байрлуулсныг харсан хэдий ч хурдаа хасдаггүй аминчхан үзэлтэй та хэр удаан амьдрах бол???

Өвөө, эмээгийнхээ өвөр дээр энхрийлүүлж, аав, ээжийнхээ гараас хөтлөн гүйж, ах, эгчтэйгээ эрхлэлдэн тоглох бяцхан 43 зүрх ч бас цохилохоо больсон. Мэдээж хэн нэгний хариуцлагагүй байдал, хууль дүрмээ хэрэгжүүлээгүйгээс шалтгаалсан. Холын замд ирээдүйгээ ярин аз жаргалтайгаар төсөөлөн явсан залуухан хос, төрсөн нутаг ижий, аавдаа очно гэдгээ дуулгасан хижээл насны гэр бүл, хайртай хүмүүсээ хоёр идүүлж, хоосон хонуулахгүй гэж хичээн яваа тээврийн жолооч нар таны хоёрхон секундын хайхрамжгүй байдал, хариуцлагагүй үйлдлээс болоод хайртай хүмүүсээ дахин харахгүй, тэврэхгүй, тэдэнтэй хамт алхахгүй болж байна. Хүсэл тэмүүлэл дүүрэн тэднийг таны нойр, таны уусан согтууруулах ундаа, таны машины эвдрэл, таны хариуцлага үгүй хийх ёсгүй.

“Хайртай“ аянд Хөвсгөл аймгийн Цагдаагийн газрын албан хаагч нар нэгдлээ

Монгол Улсын Ерөнхий сайдын ивээл доор орон даяар зохион байгуулж буй "Хурд" хамтлагийн "Хайртай" аян 2019 оны 8 дугаар сарын 28-29-ны өдрүүдэд  Хөвсгөл аймагт  үргэлжилж байна. Тус аянд  Хөвсгөл аймаг дахь Цагдаагийн газрын албан хаагч нар нэгдлээ.