Авлигатай тэмцэх газраас сар бүр зохион байгуулдаг хэвлэлийн хурал болж, олны танил болоод улс төр, бизнесийн нөлөө бүхий хүмүүсийн холбогдсон авлига, албан тушаалын гэмт хэргийн талаар сэтгүүлчдэд товч мэдээлэл өглөө. 

Энэ талаар АТГ-ын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү "Эрдэнэт үйлдвэрийн 51 хувийг Өмнөд Африкийн "Стандарт" банкинд зарсан "Жаст групп"-ийн ерөнхийлөгч Ш.Батхүүтэй холбогдох хэрэг шүүхийн шатанд явж байна. Шүүхээс манайд буцаж ирээгүй. " гэв.

Тодруулбал "Стандарт банкинд" төлөх ёстой 140 сая долларын өрийг Монгол Улсын Засгийн газраас дарж, уг мөнгийг Ш.Батхүүгээс гаргуулахаар шийдвэрлэсэн. Гэвч өнөөг хүртэл шийдэгдээгүй байна. 

Уг нь Ш.Батхүүгийн хөрөнгийг битүүмжилж, 52 тэрбум төгрөгийн хөрөнгө хураасан талаар ЗГХЭГ-ын дарга Л.Оюун-Эрдэнэ мэдэгдэж байсан ч өнөөдрийг хүртэл улсын өрийг яг барагдуулсан эсэх нь тодорхойгүй байгаа юм. Юутай ч шүүхээр уг асуудлыг бүрэн шийдвэрлэх сураг дуулдлаа.