БНТурк улсын Истамбул хот дахь Монголын консулын газрын ажилтнууд ХБНГУ-ын Дрезден хотод онц их хэмжээний хар тамхи тээвэрлэж яваад баригдсан. Тэд гурван сая орчим евро буюу 10 орчим тэрбум төгрөгөөр үнэлэгдэх хэмжээний 500 граммаар жижиглэн боосон, нийт 70 кг геройн гэх мансууруулах бодис тээвэрлэж байсан нь ил болсон. Энэ талаар Гадаад харилцааны яам ч мэдээлэл хийсэн.

Баривчлагдаад байгаа хүмүүсийн нэг нь тус улс дахь Консулын газрын дипломатч 40 орчим насны Б.Баттүшиг.  Харин түүний жолооч нь С.Эрдэнэбаяр нар байсан гэдгээ өмнө бид мэдээлсэн билээ.

Дэд консул Б.Баттүшиг гэж хэн вэ?

Б.Баттүшиг нь Улсын Дээд шүүхийн шүүгчээр ажиллаж байгаад тэтгэвэртээ гарсан Б.Бат-Эрдэнийн хүү бөгөөд өмнө нь Бангкок, ОХУ-д консулаар ажиллаж байсан. Мөн Б.Баттүшиг тагнуулын хурандаа цолтой байсан аж.

Түүнчлэн Б.Баттүшиг нь Гадаад харилцааны яамны Хяналт шинжилгээ, үнэлгээ, дотоод аудитын газрын захирал Батсүхийн Баярсайхантай базууд бөгөөд базынхаа дэмжлэгтэйгээр тус албан тушаалд томилогдсон байж болзошгүй гэх мэдээллийг эх сурвалжууд өгөөд байна.

Яагаад гэвэл ГХЯ-ны Хяналт шинжилгээ, үнэлгээ, дотоод аудитын газрын захирал Б.Баярсайхан нь Гадаад хэргийн сайд Д.Цогтбаатартай маш эртнээс нөхөрлөсөн, Д.Цогтбаатарын хаана явна, тэнд даргаар томилогддог нэгэн байгаа аж.

Харин ГХЯ-ны Хяналт шинжилгээ, үнэлгээ, дотоод аудитын газрын захирал Б.Баярсайхан 2019 оны нэгдүгээр сард дотоод аудитын шалгалтын ажлаар Истанбул дахь консулын газарт очсон юм билээ. Тэрээр шалгалтаа чанартай гүйцэтгэж, сэжигтэй үйлдлүүдийг илрүүлж, таслан зогсоож чадсан бол Монгол Улсын нэр хүнд дэлхий нийтэд шившиг болохгүй байж ч болох байв.