Төр иргэдийнхээ амьд явах, эрүүл, аюулгүй орчинд амьдрах эрхийг нь хангаж чадахгүй байгаагийн жишээтэй бид өдөр бүр нүүр тулах болсон.  Газар хөдлөлт, үер, гал түймрээс илүү төрийн байгууллагуудад буй хүнд суртал, хариуцлагагүй байдал, хоосон сүржигнэл, тархи угаалт гамшгийн хэмжээнд хүрсэн гэдгээ хэд хэдэн тод жишээ харуулсан. 

Тухайлбал, 

Нийслэлийн хэмжээнд Гамшгаас хамгаалах иж бүрэн сургуулийг энэ сарын 24-26-ны өдрүүдэд зохион байгуулахтай холбогдуулан өчигдөр Онцгой байдлын ерөнхий газраас Төрийн ордонд ажилладаг төрийн албан хаагчдад сургуулийн талаар  мэдээлэл өгсөн билээ. Гэтэл өчигдөр мөн тэр цагт Төв цэвэрлэх байгууламжид үйлдвэрлэлийн осол гарч дөрвөн сайхан залуу алтан амиа алдсан харамсалтай хэрэг гарлаа. Жинхэнэ гамшиг нь тэнд болчихоод байхад гамшгийн бэлэн байдал шалгана гэж сүржигнэх хэрэг байгаа ч юм уу даа. Энэ нөхцөлд бид иргэдээ өдөр бүр гамшгийн нөхцөл байдалд амьдруулж байж бэлэн байдлыг нь шалгана гэдэг нэг л буруу мэт. 

Төв цэвэрлэх байгууламжид болсон золгүй явдлыг үйлдвэрлэлийн осол гэдгийг хүлээн зөвшөөрчихсөн.Тэгвэл үйлдвэрлэлийн осол гарахаас урьдчилан сэргийлэх үүрэгтэй хөдөлмөрийн аюулгүй байдал хариуцсан инженерүүд нь юу хийж байсан  вэ гэдэг асуудал гараад ирнэ. Өнгөрсөн борооны хойноос цув нөмрөн чухал царайлан очсон дарга нарын амнаас унасан үг иймэрхүү дүгнэлтэд хүргэж байна.

Харин энэ  гамшгийн бэлэн байдлын иж бүрэн сургуулилалт хийнэ гэж өчнөөн мөнгө, цаг үрж, олон хүнийг залхааж байхын оронд гамшиг, ослоос урьдчилан сэргийлэх ажлыг хариуцсан байгууллага, албан тушаалтан, мэргэжилтнүүд нь дор дороо ажлаа сайн хийж, байх ёстой газрдаа баймаар юм.