Баянхонгор аймгийн Баацагаан сумын цэцэрлэгийн багш 3 настай хүүхдийн гарыг хаалганд хавчуулсны улмаас хуруу нь тасарсан хэрэг өнгөрсөн долоо хоногт гарчээ. Хүү тус аймгийн Нэгдсэн эмнэлэгт хэвтэн эмчлүүлж байгаад өчигдөр эмнэлгээс гарсан байна. 

Хүүгийн талаар Баянхонгор аймгийн нэгдсэн эмнэлгээс буюу хүүгийн эмчлэгч эмчээс тодруулахад, "Хүүгийн биеийн байдал сайжирч, шарх нь цэвэршээд энэ сарын 15-нд буюу даваа гарагт эмнэлгээс гарсан байгаа. Одоо амбулаторын хяналтад боолт хийгдээд явж байгаа. Анх ирэхдээ баруун гарын тавдугаар хуруу буюу чигчий хуруу нь өндөгний хэсгээрээ тасарсан хүүхэд ирсэн" гэх мэдээллийг өглөө. 

Мөн хүүгийн хуруу дахин төлжих боломжгүй юм байна. 

Энэ хэргийн талаар бид эргэн мэдээлэх болно.

Т.Гэрэл