ХӨСҮТ-өөс хоолны хордлогын улмаас эмчлүүлж буй иргэдээс цусан суулга өвчин үүсгэдэг шигел гэх нян илэрсэн талаар мэдээлсэн бол НМХГ-аас KFC сүлжээ хоолны газрын хоолны дээжээс авсан шинжилгээний хариуг танилцууллаа.

ШУУД ҮЗЭХ: 

НМХГ-ын Эрүүл мэнд, боловсрол соёлын хяналтын хэлтсийн дарга Д.Цэнд-Аюуш: 

"2019 оны хоёрдугаар сарын 12-ны өдөр ХУД-ийн 11 дүгээр хороонд байрлах Зайсан KFC салбарт хийсэн хяналт шалгалтын дүнг танилцуулж байна. Манай мэргэжилтнүүд зургаан өдөр тасралтгүй маш ачаалалтай ажиллалаа. Тандалт шалгалтын хугацаанд хоолны 39  бүтээгдэхүүнээс дээж авч шинжилсэн. Мөн эрүүл ахуй, орчин гээд нийт 94 сорьцоос дээж авч шинжилж ажилласан.

Тухайн салбар 28 ажилтантай. Шалгалтын явцад ажилчдын зарим эрүүл мэндийн шинжилгээ дутагдалтай, дотоод хяналт тавьдаггүй, мэргэжлийн хяналтын байгууллагаас зөвшөөрөөгүй ариутгал халдваргүйтлийн бодис хэрэглэсэн байна.

Уг хордлогын улмаас өнгөрсөн хугацаанд нийт 242 хүнд эмнэлзүйн шинж илэрч, 42 хүн эмнэлэгт хэвтэн эмчлүүлж байгаа" гэв.

Хоёрдугаар сарын 9-12-ний өдрийн хоолны дээжээс шинжилгээ авжээ. Ингэхэд ундны уснаас халуунд тэсвэртэй савханцар зөвшөөрөгдөх дээд хэмжээнээс илүү илэрсэн байна. Зайсангийн орчмын аж ахуй нэгжүүд өөрсдөө ундны усыг  гүнээс авдаг. Тиймээс бусад салбарт усны асуудал байгаа гэж хэлж болохгүй. Ундны усны юунаас болж бохирдсоныг тодруулахаар нарийвчилсан шалгалтыг дахин хийнэ. 

Бид зөрчил шийдвэрлэх тухай хуулийн дагуу хамгийн эхний зөрчил гаргасан салбарт шалгалт хийсэн. Харин өнөөдрөөс үлдсэн 11 салбарын үйл ажиллагаанд шалгалт хийнэ. Өнөөдөр Зайсанд байрлах салбарын үйл ажиллагааг хааснаас бусад салбарын үйл ажиллагааг зогсоогоогүй байгаа. Шалгалт хийж дууссаны дараа хаах эсэхийг шийднэ.