"Боловсрол" сувгаар ням гариг болгон "Mongolia’s next top model-2" шоу  нэвтрүүлгийг хүргэж байгаа билээ. “Монгол модель” агентлагийн загвар өмсөгч, “Mongolia’s next top model-2” шоу нэвтрүүлгийн оролцогч Ч.Чамин-Эрдэнэ 2018 оны аравдугаар сарын 24-нд зуурдаар амиа алдсан харамсалтай хэрэг гарсан. 

Уг хэрэг гарах үед "Mongolia’s next top model-2" шоу нэвтрүүлэг үргэлжилж байсан. Гэхдээ дэлхийн контент дүрмийнхээ дагуу шоу нэвтрүүлгээ урьдчилан бичсэн байсан талаар шоу багийнхан яг одоо "Монгол ньюс" мэдээллийн төвд мэдээлэл хийлээ. 

"Манай нэвтрүүлэг гадаадын контент учраас цаанаас нь албан ёсны форматын зааврыг өгдөг. Зураг авалт маш олон хоногоор хийгддэг. Монгтажийн ажил яг форматын дагуу явагдаж байгаа. Нэвтрүүлгийн охидууд нэг байранд амьдарч хоёр сарын турш тэмцээн болсон. Энэ хугацаанд охидуудын дунд янз бүрийн асуудал болдог. Тэгэхдээ сошиалаар яваад байгаа шиг хэн нэгнийгээ үзэн ядах, амь насанд нь хүрэх хэмжээний хурцадмал асуудал нэг ч удаа гарч байгаагүй гэдгийг албан ёсоор хэлж байна." хэмээлээ. 

МNТМ нэвтрүүлгийн шүүгч Нора:

Боловсрол телевиз, загварын ертөнцийн хувьд нөхөж баршгүй том гарз болсон. Талийгаачтай 3 сарын турш хамт ажиллаж нэвтрүүлгээ хийсэн. Нас барсны дараа бид бүгд шоконд орсон. Миний хувьд тэр үед Монгол улсад байгаагүй. БНХАУ-д ажил хэргийн шугамаар явж байсан. Манай шоуны төлөөлөл, Боловсрол телевизийн захирал ар гэрт нь очиж эмгэнэл илэрхийлсэн. Нэвтрүүлгийн оролцогч болох н.Одонтунгалагруу дайрч байгаа. Нэвтрүүлгийн оролцогчид бие биенийгээ үзэн ядаж, биенийхээ аминд хүрэх хэмжээний асуудал үүсээгүй. Манай нэвтрүүлэг, Боловсрол телевиз, хувь хүнрүү дайрсан гүтгэлгийн шинжтэй мэдээллийг битгий түгээгээч гэж хэлмээр байна. Сошиалаар хэн нэгнийг яагаад шүүлтүүр хийхгүйгээр доромжилж болдог юм бэ. Оролцогч н.Одонтунгалаг өнөөдөр хичээлдээ ч явж чадахгүй хүнд байдалд байна. Үнэн мөнийг шүүх, цагдаагийн байгууллага тогтоох болохоор та бүхэн хамаагүй худал хуурмаг зүйлд итгэж, гүтгэхгүй байхыг хүсье.