ГАЛТ ЗЭВСЭГ ЭЗЭМШИГЧ ЗААВАЛ СУРГАЛТАД СУУНА

Улсын хэмжээнд бүртгэгдсэн гэмт хэрэг, зөрчлийн статистик мэдээгээр галт зэвсгээр үйлдсэн гэмт хэрэг 2018 оны эхний есөн сарын байдлаар 25 бүртгэгджээ. Энэ нь өмнө оныхоос буурсан үзүүлэлт юм байна.

Цагдаагийн байгууллагаас өмнөх жилүүдэд зохион байгуулсан тооллогоор

2016 онд 47225 галт зэвсгээс 31798 буюу 70.6 хувь нь
2017 онд 46327 галт зэвсгээс 36028 буюу 78.1 хувь нь хамрагджээ.
Үүнээс орон нутагт 32913 галт зэвсэг бүртгэлтэйгээс 26433 буюу 82.2 хувь нь нийслэлийн хэмжээнд 13414 галт зэвсэг бүртгэлтэйгээс 9595 буюу 73.9 хувь нь тоологджээ.

Галт зэвсгийн бүртгэлийн нэгдсэн санд нийт галт зэвсэг болон түүнтэй адилтгах хэрэгсэл 47393 бүртгэлтэйгээс

галт зэвсэгтэй адилтгах хэрэгсэл 311,
ан агнуурын 45127,
цуглуулгын 197,
спорт сургалтын 1716,
харуул хамгаалалтын 353 галт зэвсэг бүртгэгджээ.
Хууль бусаар галт зэвсэг, сум хэрэгсэл олж авдаг, хадгалдаг, борлуулдаг энэ төрлийн гэмт хэрэг үйлдэж болзошгүй 89 сэжигтэй этгээд (ченж)-ийг бүртгэл, хяналтад авчээ.

Бүртгэлд хамрагдаагүй шалтгаан нь галт зэвсгийн шилжилт хөдөлгөөн хийлгээгүй, шилжиж очсон нутаг дэвсгэрийн цагдаагийн байгууллгад бүртгүүлэхээгүй байх, бүртгүүлэхгүйгээр бусдад худалдах зэрэг байдаг аж. Мөн хөдөө орон нутагт эх сурважл тодорхойгүй, бүртгэлгүй олон жил хадгалсан зэрэг нийтлэг зөрчил илэрдэг аж.

Монгол Улсын Галт зэвсгийн тухай хуулийн дагуу иргэн, хуулийн этгээдийн өмчлөлд байгаа галт зэвсэг, галт зэвсэгтэй адилтгах хэрэгслийн тооллого энэ сарын 12-нд эхэлжээ.

Хоёр сарын хугацаатай үргэлжлэх нэгдсэн арга хэмжээний хүрээнд Галт зэвсгийн тухай хууль, холбогдох журмын хэрэгжилтийг хангах, галт зэвсгээр үйлдэгдсэн гэмт хэргийг илрүүлэх, галт зэвсэг, галт зэвсэгтэй адилтгах хэрэгсэл, сумны хууль бус наймааг таслан зогсоох, эрэг сурвалжлагдаж байгаа гал зэвсэг, түүнтэй адилтгах хэрэгслийг илрүүлэх, бүртгэх, гэрчилгээжүүлэх ажлыг зохион байгуулж байна.

Иргэд болон хуулийн этгээд галт зэвсэг болон түүнтэй адилтгах хэрэгслийг бүртгүүлэхдээ,

Галт зэвсгийн гэрчилгээ
Иргэний үнэмлэх эсвэл хуулийн этгээдийн улсын бүртгэлийн гэрчилгээ,
Галт зэвсгийг аюулгүй байдлыг хангах биет байдлаар авч ирэн нийслэлийн иргэд бол Нийслэлийн цагдаагийн газар орон нутагт оршин суугаа нутаг дэвсгэрийн цагдаагийн байгууллагын эрх бүхий албан тушаалтанд бүртгүүлэх юм.
Галт зэвсэг эзэмшигч зайлшгүй сургалтад суусан байх ёстой. Сургалт долоо хоног бүр болдог бөгөөд хоёр хоногийн хугацаанд болдог байна. Бүртгэл арванхоёрдугаар сарын 12-ныг дуустал үргэлжлэх юм байна.  

ШУУД ҮЗЭХ: