Монголын юань улсын Хубилай сэцэн хааны хөшөө Төрийн ордны урд сүндэрлэж байна. Уг хөшөө нь 6.6 метр өндөртэй, 5.5 метр урттай, 3.5 метр өргөнтэй, хүрэл, гантиг материалаар хийгдсэн байна. Хубилай хааны хөшөөг бүтээсэн нь Монголын Юань улсыг үндэслэж, Их Монгол улсыг дэлхийн цараатай асар том эзэнт гүрэн болж цаашид олон арван жил тогтвортой оршин байх эх үндсийг тавьсан аугаа хаан гэсэн санааг агуулжээ.

Хааны дүр төрхийг номхон дөлгөөн харцтай, эрдэм номонд гэгээрсэн төрхтэй, барсын сэнтийн дээр монгол дээл хувцастай заларч буйгаар дүрсэлжээ. Хааны гарт тухайн үеийн хуйлмал албан бичгийг дэлгэн бариулсан нь түүний зарлигаар 1269 оны орчим Пагва лам Лодойжалцан /1234-1279/ монгол дөрвөлжин үсгийг зохиосон гэсэн санааг давхар өгүүлжээ.