Нийслэлчүүд 2015 оноос эхлэн Монголын анхдугаар Богд Өндөр гэгээн Занабазарын мэндэлсний 380 жилийн ойг тохиолдуулан 100 жилийн өмнө Их хүрээнд тэмдэглэдэг байсан Даншиг наадмыг сэргээн  тэмдэглэж эхэлсэн билээ.  Монголын бурхан шашны сүм хийдүүд, НЗДТГ-тай хамтран Улаанбаатар хотноо Хүй долоон худагт  энэ сарын 4,5-нд ийнхүү Хүй долоон худагт наадацгааж байна.  

Зуу гаруй жилийн өмнө их хүрээнд тэмдэглэдэг байсан даншиг наадмаар дамжуулан үндэсний соёл, зан заншлыг олон нийтэд сурталчлах, сүсэгтэн олонд зориулсан буддын шашны зан үйлийг сэргээх боломжийг бүрдүүлж байгаа бөгөөд гадаадын жуулчдын тоог нэмэгдүүлэх зорилготой юм . 

Наадмын үеэр Хүрээ цам гарч байсан уламжлалын дагуу цам гарч, даншиг наадмын шашны уламжлалт зан үйлийг үйлдэнэ. Мөн Буддын шашны хийдийн лам нар Хүй долоон худаг дахь цамын талбайд сүсэгтэн олонд зориулан ном хурж, ерөөл айлдлаа. 

“Даншиг наадам-Хүрээ цам 2017” шашин, соёлын наадам Хүй долоон худагт өнөөдөр хоёр дахь өдрөө үргэлжилж байна. Даншиг наадмын хүрээнд болдог Хүрээ цам, Жахар цамын хурал өглөө 09.00 цагт эхэллээ.  “Даншиг наадмын хамгийн гол зүйл нь цам харайх билээ. Цам нь ад, зэтгэр, гай хөнөөлийг даран сөнөөх учир агуулгатай зүйл юм. Цам цамнахдаа гар, хөл, биеийн олон хөдөлгөөнөөр дотоод сэтгэлийн бясалгалыг илэрхийлэхийн зэрэгцээ хортон дайсан, ад зэтгэрийг догшдын үйлдлээр даран сөнөөж буй хөдөлгөөнүүдийг үзүүлнэ. Мөн энэ үед нууц тарнийн хатуу зан үйл болох “Линга” эвдэх, “Жахар”, “Сор” залах зэрэг үйлийг ​​​​​​үйлддэг.