Энэ оны эхнээс Ус сувгийн удирдах газраас сар бүр өр төлбөртэй байгууллага, аж ахуйн нэгж, хэрэглэгчдийн нэрсийг олон нийтэд зарлаж байгаа билээ. Манай байгууллага нийслэл хотын нийт хүн амыг стандартын шаардлагад нийцсэн цэвэр усаар найдвартай, тасралтгүй хангах, хэрэглээнээс гарсан бохир усыг экологийн тэнцвэрт нийцүүлэн байгальд нийлүүлэх хариуцлагатай үүргийг хүлээн ажилладаг. 

      Төвлөрсөн орон сууцанд оршин сууж байгаа иргэдэд үйлчилгээ үзүүлдэг  манай байгууллагатай гэрээтэй хувийн болон орон нутгийн өмчит газрууд нь орон сууцны хэрэглэгчдээс хураан авсан усны төлбөрөө  тухайн сардаа багтаан төлөхгүй өөр  зориулалтаар зарцуулж байгаагаас ихээхэн хэмжээний төлбөр хуримтлагдан өр үүссээр байна.    

       Хангагч болон хэрэглэгч 2 байгууллагын хооронд байгуулсан аж ахуйн гэрээгээр хүлээсэн үүргээ мөрдөн ажиллахгүй байгаа байгууллага, компани, аж ахуйн газруудад нийлүүлж байгаа усыг хуульд зааснаар тодорхой хугацаагаар таслах арга хэмжээг хааяахан хэрэгжүүлж байгаа хэдий ч гагцхүү цаана нь оршин суугчид хор хохиролыг нь амсах учраас өнөөдрийг хүртэл усаар хангах үйл ажиллагааг тасралтгүй хүргэсээр байна.

       Тус байгууллагаас өр авлагатай газруудын төлбөрийг барагдуулах талаар холбогдох дээд шатны байгууллагад хүсэлт гарган хамтарсан уулзалт, семинар зохион байгуулах, авлага хэсэгчлэн барагдуулах график байгуулах,  хууль хяналт, шүүхийн байгууллагад хандан шийдвэрлүүлэх  зэргээр шат дараатай арга хэмжээг авч хэрэгжүүлснээр зарим нааштай үр дүн харагдаж байгаа хэдий ч өр төлбөртэй байгууллага, компани, орон нутгийн өмчит үйлдвэрийн газрууд усны өр төлбөрөө бууруулах талаар санаачлага гарган ажиллахгүй байна.