Өнөөдөр буюу 2018 оны 06 дугаар сарын 21-ний өдөр Монголын Эрүүл мэндийн ажилтны ҮЭ-ийн холбооноос Засгийн газарт, Ерөнхий сайд У.Хүрэлсүхэд шаардлага хүргүүлж жагсаж байна. Учир нь Хөдөлмөр, нийгмийн зөвшлийн гурван талт 2017-2018 оны Улсын хэлэлцээрийн 3.2 дах заалт, нэмэлт хэлэлцээрийн 1, 3, 5, 7, 8 дах заалтуудыг өнөөдрийг хүртэл хэрэгжүүлэхгүй үл тоож байгааг эрүүл мэндийн салбарын ажилтнууд эрс эсэргүүцэж байгаа аж. Тэр дундаа улсын 3 талт хэлэлцээрийг  Хөдөлмөр нийгэм хамгааллын сайд С.Чинзориг үл тоон гацааж, өнөөдрийг хүртэл нэг ч алхам хийгээгүй учраас түүнийг огцрохыг шаардаж жагсаж байгаа аж. 

Түүгээр ч үл барам Хөдөлмөр, нийгмийн зөвшлийн гурван талт 2015-2016 оны улсын хэлэлцээрийн 3.4-т “Төрийн албан хаагчдын 2015 оны цалин хөлс, нийгмийн даатгалын шимтгэлийн зардалд 90.0 тэрбум төгрөг,  тэтгэвэр нэмэгдүүлэхэд улсын төсвөөс нийгмийн даатгалын санд олгох татаасыг 13.0 тэрбум төгрөгөөр нэмэгдүүлж 2015 оны төсвийн тодотголд тусган УИХ-аар шийдвэрлүүлнэ. Төрийн албан хаагчдын цалинг үе шаттайгаар нэмэгдүүлэх хувь хэмжээ, хэрэгжүүлэх хугацааг салбарын яамд, үйлдвэрчний салбарын холбоодтой тухай бүр зөвшилцөж шийдвэрлэнэ. Төсөвт байгууллагын төсвийн хэмнэлтийг цалин нэмэгдүүлэхэд зарцуулах асуудлыг салбарын хамтын хэлэлцээр, хамтын гэрээгээр шийдвэрлэж байна.” гэсэн заалт оруулж тохиролцсон боловч энэ заалт мөн хэрэгжээгүй 4 жил болж байгаа юм байна.

Монголын эрүүл мэндийн үйлдвэрчний эвлэлийн дарга Ж.Мягмар ХНХЯ-ны Төрийн нарийн бичгийн даргатай уулзсаныхаа дараа дараах мэдээллийг өглөө. Тэрбээр,

“Ямар ч шийдэлд хүрсэнгүй. Эрүүл мэндийн салбарын ажилтнууд цалингаа нэмүүлэхийн тулд маш удаан хугацаанд тэмцэл хийж байна. Ингээд салбар яамтайгаа хэлэлцээр байгуулсан. Ингэхдээ тооцоо судалгаан дээр үндэслэн хэлэлцээр хийсэн ч ХНХ-ын сайд С.Чинзориг хууль бусаар хэлэлцээрийг бүртгэхээс татгалзсан. С.Чинзориг эмнэлэгт хэвтэж байгаа шалтгаанаар бид яамны Төрийн нарийн бичгийн даргатай уулзсан ч бидний өнөөдрийн шаардлагыг бичгээр хүлээн авч, бичгээр хариу өгнө гэлээ. Тиймээс өнөөдөр бид өнөөдөр энд суух шаардлагагүй боллоо.

Маргаашнаас эхлээд эрүүл мэндийн салбарынхан хүсэлтээ өгч, тав хоногийн дараа ажил хаялт хийх эрх нь үүснэ. Эмч эмнэлгийн ажилтнуудад удаа дараа худлаа ярьж, итгэл сэтгэлийг нь хөсөрдүүлсэн сайдаа татаж авах шаардлагыг УИХ-д хүргүүлнэ.

Мөн бид яг одоо Монголын үйлдвэрчний эвлэлийн холбооны дарга Амгаланбаатарыг огцрохыг шаардсан бичгийг өгнө” гэлээ.

Монголын Эрүүл мэндийн ҮЭ-ийн холбооноос дараах шаардлагыг хүргүүлсэн байна. 

"Эрүүл мэндийн салбарын 48 мянга гаруй ажилтнууды төлөөлөн Монголын эрүүл мэндийн ажилтны ҮЭ-ийн холбооны гишүүд, сонгуультан, эмч, сувилагч, ажилтнуудыг төлөөлж Хөдөлмөр, нийгмийн хамгааллын яамны гадна талбайд энэ сарын сарын 21-ний өдөр цуглаанд оролцогчдоос Монгол Улсын Засгийн газарт хандан дараах асуудлыг нэн даруй шийдвэрлэхийг ШААРДАЖ байна. Үүнд:

1. Эрүүл мэндийн салбарын ажилтнуудын цалин хөлсийг нэмэгдүүлэх, хүний нөөцийн бодлогыг сайжруулж, сувилагчийн орон тоог нэмэгдүүлэх, нийгмийн хамгаалал, хөдөлмөрийн аюулгүй байдал, эрүүл ахуй зэрэг асуудлаар салбар дотроо тохиролцон шийдвэрлэх боломжтой гэж үзэн 2018 оны 05 дугаар сарын 29-ны өдөр байгуулсан “Эрүүл мэндийн салбарын 2017-2018 оны хамт(тариф)-ын нэмэлт хэлэлцээр”-ийг хууль бусаар ямар нэг шалтаг, шалтгаан тоочихгүйгээр энэ сарын 21-ны дотор бүртгэх,
2. Хөдөлмөр, нийгмийн зөвшлийн гурван талт 2015-2016 оны улсын хэлэлцээрийн 3.4 дэх заалт, мөн 2017-2018 оны Улсын хэлэлцээрийн 3.2 дах заалт, нэмэлт хэлэлцээрийн 1, 3, 5, 7, 8 дах заалтуудыг тохиролцож гарын үсэг зурж баталгаажуулсан боловч огт хэрэгжүүлэхгүй, ажлаа хийдэггүй, худалч Хөдөлмөр, нийгмийн хамгааллын сайд С.Чинзоригийг албан тушаалаас нь огцруулах,

Дээрх шаардлагыг хэрэжүүлээгүй тохиолдолд “Хөдөлмөр, нийгмийн зөвшлийн улсын 3 талт хэлэлцээр”-ээр үүсгэсэн хамтын маргааны хүрээнд ажил хаялт хийх эрх үүссэн тул 2018 оны 06 сарын 22-ны өдрөөс эхлэн ажил хаялт зарлахаа албан ёсоор мэдэгдэж байна" гэсэн байна. 

Гэрэл зургийг: MPA.MN