Монгол Улс Олон улсын валютын сангийн зөвлөмжийн дагуу энэ оны нэгдшүгээр сарын 1-нээс эхлэн шатахуунаас авах онцгой албан татварын хэмжээг нэмэгдүүлсэн билээ. Үүнтэй холбоотойгоор нефть импортлогчид компаниуд түгээлтээ хязгаарлах, үнэ нэмэгдүүлэх зэрэг үйлдэл гаргаж, нийслэлд шатахууны хомсдол үүссэн. Шатахууны үнийг зохицуулах зөвлөл энэ сарын 11-ний өдөр хуралдаж, ажлын хэсэг гарган үнийг тогтвортой байлгах боломжийг судлахаар болж, ямар нэгэн шийдэлд хүрэх хүртэл хязгаарлалт хийх, үнэ нэмэх үйлдэл гаргахгүй байхыг ШӨХТГ-аас нефть бүтээгдэхүүн импортлогч компаниудад анхааруулсан юм. Салбарын сайд, дэд сайд нь ч шатахууны үнэ, хүртээмжид санаа зоволтгүй байж болно гэсэн мэдэгдлийг удаа дараа хийсэн. Гэвч үнэн хэрэгтээ нефть импортлогч компаниуд хязгаарлалт хийж, шатахууны үнэ зохицуулах зөвлөл, ШӨХТГ-аас гаргасан шийдвэрийг зөрчсөөр байна.

Шатахуун түгээх станцууд ажиллаж байгаа боловч зөвхөн талон, карт эзэмшигчдээ үйлчлэх зэргээр хязгаарлалт хийж байгаа юм.

Бид зарим шатахуун түгээх станцуудаар явж, байдал ямар байгааг сурвалжилсан юм. Ингэхэд дараах байдалтай байна.

“Петровис”

“Петровис”-ын аравдугаар хорооллын уулзварт байдаг салбар нано “Аи 92” шатахууныг 1730 төгрөгөөр борлуулж байв. Үүнээс өмнө тус компани нано Аи 92 шатахуунаа ердийн регуляр Аи 92 шатахуунтай ижил 1630 төгрөгөөр борлуулж байсан билээ.