Нийслэлийн Цагдаагийн газраас санаачлан Монгол Улсад Гэмт хэргээс урьдчилан сэргийлэх ажлыг зохицуулах зөвлөл, Нийслэлийн Иргэдийн Төлөөлөгчдийн хурал, нийслэлийн Засаг даргын тамгын газартай хамтран “Хамтарсан багийн үйл ажиллагааг эрчимжүүлэхэд анхаарах асуудал” сэдэвт уулзалт, зөвлөгөөнийг зохион байгууллаа.

Гэр бүлийн хүчирхийлэлтэй тэмцэх тухай хууль, Хүүхэд хамгааллын тухай хуулиар үүрэг хүлээсэн “Хамтарсан баг”-ийн үйл ажиллагааг эрчимжүүлэх, гэр бүлийн хүчирхийлэл, хүүхдийн хүчирхийллээс урьдчилан сэргийлэх, хохирогчийг эрт илрүүлэх, нөхөн сэргээх ажлыг шуурхай зохион байгуулах, хүчирхийллийг таслан зогсоох чиглэлээр салбар хоорондын уялдаа холбоог сайжруулах зорилгоор уулзалт, зөвлөгөөнийг зохион байгуулж, нийслэлийн 152 хорооны хамтарсан багийн 1000 гаруй гишүүд оролцов.

Уулзалт, зөвлөгөөнөөр хуулиар үүрэг хүлээсэн байгууллагуудаас Хамтарсан багийн үйл ажиллагааг эрчимжүүлэх, салбарын уялдаа холбоог сайжруулах чиглэлээр авах арга хэмжээний талаар мэдээлэл хийж, санал солилцсон.

Уулзалт, зөвлөгөөнд оролцогчдоос гэр бүлийн хүчирхийллийг таслан зогсоох, хохирогчийн зөрчигдсөн эрхийг сэргээх, хүчирхийлэл давтан үйлдэгдэхээс урьдчилан сэргийлэх ажилд иргэд олон нийтийн оролцоог нэмэгдүүлэх талаар “Уриалга” гарган үйл ажиллагаандаа хэрэгжүүлэхээр боллоо гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.