Монгол Улсад 117 улсын 25 мянга гаруй иргэн оршин сууж байна. Гадаадын иргэн, харьяатын газрын мэдээллэснээр эдгээр иргэдийн 41 хувийг хөдөлмөр эрхлэх зорилготой оршин суугчид бүрдүүлж байгаа бол гадаад иргэдийн 29 хувь нь гэр бүлийн болон хувийн шалтгаанаар Монгол Улсад амьдарч байна.

Гадаадын иргэн, харьяатын газрын дарга Д.Мөрөн "Бүртгэл, хяналтын системийг боловсронгуй болгох, виз мэдүүлэх шат дамжлагыг багасгах, Монгол Улсад оршин суух зөвшөөрөл авсан гадаадын иргэдийг гарах-орох виз авах шаардлагаас чөлөөлөх асуудлыг олон улсын жишигт нийцүүлэх" шаардлагатай гэдгийг энэ сард зохион байгуулагдсан эрдэм шинжилгээний хурлын үеэр онцолжээ. Үүнээс гадна 1999 оноос хойш гадаадын иргэнд үрчлүүлсэн монгол хүүхдийн тоо 266 хүрээд байгаа бөгөөд эдгээрээс 80 орчим хувийг АНУ-ын иргэд үрчилж авсан байна. Ихэвчлэн Япон, Итали, Герман, Франц улсын иргэд Монголоос хүүхэд үрчлэн авчээ. Түүнчлэн өнөөдрийн байдлаар Монгол Улсад 1900 гаруй цагаач иргэн байгаа аж. Үүнээс 700 орчим нь ОХУ, 1200 орчим нь БНХАУ-ын иргэн байна.