Эрүүл мэндийн сайд өнөөдөр Зоонозын өвчин судлалын үндэсний төвд ажиллалаа. Энэ үеэр тус төвийн захирал М.Нямсүрэн байгууллагын үйл ажиллагааг Эрүүл мэндийн сайдад танилцуулав.Н.Удвал сайд байгууллагын үйл ажиллагаатай танилцсаны дараа эрүүл мэндийн салбарын шинэчлэлийн хүрээнд хийгдэж байгаа ажлуудыг тус төвийн хамт олонд танилцуулж, тэдний асуусан асуултад хариулт өгч, харилцан ярилцлаа. 

 Эрүүл мэндийн сайд тус байгууллагыг орчин үеийн шаардлагад нийцсэн зорилго, зорилт, стратегийн хүрээнд ажиллахыг зөвлөлөө. Түүнчлэн ЗӨСҮТ-ийн нөөцийн жагсаалтыг шинээр гаргаж бүрдүүлэх, агуулахын байрыг барих хөрөнгийг шийдэж өгөх, зарим салбар төвүүдийг автомашинаар хангах зэрэг асуудлыг нэн даруй сайдын зөвлөлийн хурлаар хэлэлцүүлж, шийдэхээ мэдэгдлээ.

 Тус төв нь мал, амьтнаас хүнд халдварладаг байгалийн голомтот шинэ ба сэргэн тархаж байгаа өвчинтэй тэмцэх, сэргийлэх чиг үүрэг бүхий тусгай дэглэмтэй байгууллага юм. Одоогийн байдлаар тус төв нь аймаг, нийслэлд нийт 14 салбар төвтэйгөөр 395 ажиллагсадтай үйл ажиллагаагаа явуулж байна. Өнгөрсөн 2 жилийн хугацаанд тус төвийн аймаг, нийслэл дэх салбаруудаас 180 орчим эмч, мэргэжилтнүүд гадаадад мэргэжил дээшлүүлэх сургалтад хамрагджээ. Өнгөрсөн жил манай улсад хамгийн их тохиолддог зоонозын өвчнөөр тарваган тахал, шувууны томуу, боом, галзуу, хачигт энцефелит зэрэг өвчнүүд орсон байна. Ялангуяа галзуугийн сэжигтэй амьтны дайралтад өртсөн хүний тоо 2004-2008 онд 110 байсан бол 2009-2013 онд 554 болж даруй 5 дахин өссөн харагдаж байлаа.

Цаашид салбар нэгжгүй аймагт салбар нээх, нөөцийн хангалтыг тогтмол хийх, нөөцийн шинэчлэлт, хангалтын асуудал дээр түлхүү анхаарч ажиллахаа тус төвийн захирал мэдээллээ.