Баянзүрх дүүргийн 20 дугаар хорооны Гачууртад өнгөрсөн сарын 31-нд гарамгүй газраар “Range Rover” маркын автомашин Туул голыг гатлах үед голын усны хайрганд идэгдсэн гүн рүү орж  дотор нь сууж явсан зургаан том хүн, хоёр сартай нярай хүүхэд  живэх аюулд  өртжээ. Автомашины жолооч М.Золбоо бусад хүмүүсээ машиныхаа дээр гаргаж чадсан ч өөрөө гар алдан голын хүчтэй урсгалд урссан байна. Харин голын эрэг дагуу амарч байсан амрагчид тэднийг харсан даруйдаа Шуурхай удирдлагын төвийн 102 дугаарт дуудлага өгч цагдаа жолооч М.Золбоог аварч цаг алдалгүй эмнэлгийн тусламж үзүүлжээ.