Лхагва гарагийн байдлаар Хөдөө аж ахуйн биржид 770.9 сая төгрөгийн ноолуурын арилжаа хийсэн байна. Ингэхдээ боловсруулаагүй цайвар ноолуур 10 тонн, бараан ноолуур гурван тонныг борлуулжээ. Харин ханшийн хувьд нэг килограмм тутам нь 59 мянга 300 төгрөгийн үнэд хүрсэн талаар Хөдөө аж ахуйн биржээс мэдээллээ. Дөрөвдүгээр сараас эхлэн ноолуурын арилжаа идэвхжээд байгаа бөгөөд зөвхөн өнгөрсөн долоо хоногт гэхэд нийт арилжааны 91.4 хувь буюу 11.8 тэрбум төгрөгийн ноолуурын арилжаа хийсэн байна. Нэг килограмм боловсруулаагүй бараан ноолуурын ханш 54 мянга 527 төгрөг байсан бол цайвар ноолуурыг дунджаар 55 мянга 543 төгрөгөөр арилжаалжээ. Энэ нь өнгөрсөн оны мөн үеийн ханштай харьцуулахад ойролцоогоор 17 орчим хувиар бага үзүүлэлт болж байна.