Өнөөдөр Монголын телевизүүдийн холбооноос хэвлэлийн хурал хийлээ. Тус хурлаар тун удахгүй болох гэж байгаа АСЕМ болон Үндэсний их баяр наадам, сонгуулийн ажлыг хэрхэн дамжуулах талаар мэдээлэл өгсөн юм.

Монгол телевизүүдийн холбоонд өдгөө 16 телевиз харьяалагддаг. Өнгөрөгч 2015 оны үндэсний их баяр наадмын үйл ажиллагааны хөтөлбөрийг дээрх телевизүүд хамтран нэг сигналаас дуу дүрсний өндөр чанартайгаар шууд дамжуулсан юм. Энэ туршлагадаа үндэслэн дараа дараагийн ажлуудаа илүү сайжруулан хийхээр төлөвлөжээ.

Мөн Монгол телевизүүдийн холбоо гишүүн телевизүүдийнхээ нэвтрүүлэг, контентыг үнэлэн тодорхой хэмжээний хураамжийг телевизүүдэд өгч байх хүсэлтийг олон сувгийн (IPTV) үйлчилгээ эрхлэгчдэд хүргүүлсэн тухайгаа хэллээ. Уг хүсэлтийг олон сувгийн үйлчилгээ эрхлэгчид нааштайгаар хүлээн авсан бөгөөд одоогийн байдлаар энэ асуудлыг хэрхэн шийдэх талаар хэлэлцэж байгаа аж.