Одонтой эхчүүдийн халамжийн мөнгийг хэзээнээс олгож эхлэх талаар Нийгмийн халамж үйлчилгээний газрын Нийгмийн халамж үйлчилгээний бодлогын хэрэгжилтийн дарга М.Лхагвасүрэнгээс тодрууллаа.  

-Одонтой эхчүүдийн мөнгийг хэзээнээс олгож эхлэх вэ?

-Одонтой эхчүүдийн мөнгө журмынхаа дагуу тухайн жилийн нэгдүгээр улирал буюу гуравдугаар сарын 8-наас өмнө олгогдсон байх ёстой байдаг. Улсын төсвөөс санхүүждэг учраас төсвийн бүтэц гол нөлөө үзүүлдэг. Урд жилүүдэд Цагаан сарын өмнө олгодог байсан. Энэ жил хэзээ олгохыг шийдээгүй байна.

-Эхчүүд одонгийн мөнгөө авахын тулд ямар бичиг баримт бүрдүүлэх шаардлагатай вэ?

- Тухайн хүний үйлчилгээнд хамрагдахыг хүссэн өргөдөл, иргэний үнэмлэхийн хуулбар, одонгийн үнэмлэхийн хуулбар байхад болно.  

- Бүрдүүлсэн материалаа хаана өгөх ёстой юм бол?

- Одонгийн халамжид хамрагдах гэж байгаа бол харьяа аймаг, дүүргийнхээ Иргэдийн төлөөлөгчдийн хуралд материалаа өгнө. Одонгийнхоо үнэмлэхийг авсан  үедээ материалаа бүрдүүлээд өгчихөж болно.

- Урьд нь авч байсан хүмүүс энэ материалыг дахин бүрдүүлж өгөх шаардлагатай юу?

- Шаардлагагүй. Зөвхөн шинээр хамрагдаж байгаа ээжүүд материал бүрдүүлж өгөх үүрэгтэй.

-Одонтой эхчүүдийн мөнгө энэ жил нэмэгдэх үү?

-Урьдынхаараа олгоно. Нэгдүгээр зэргийн одонтой ээжүүд буюу 6 ба түүнээс дээш хүүхэд төрүүлсэн эх жилд 200.000  төгрөг, хоёрдугаар зэргийн одонтой эхчүүд буюу 4 ба түүнээс дээш хүүхэд төрүүлсэн бол жилд 100.000 төгрөг авдаг. Мөн тэгээс гурван настайд нь хүүхэд үрчилж аваад, хүүхдийн тоо дөрвөөс дээш байвал одонтой эхчүүдийн халамжинд хамрагдаж болно.

-Энэ онд эхчүүдэд олгохоор хэдэн төгрөг төсөвлөсөн бэ?

-Жил бүр улсаас гучин тэрбум төгрөгийг төсөвт суулгадаг. 2015 оны байдлаар улсын хэмжээнд одонтой эхчүүдэд 28.3 тэрбум төгрөгийг олгосон. Энэ жилийн хувьд төсвөө хараахан тодорхойлоогүй байна.

- Одонгийн мөнгийг хэзээ олгохыг иргэд хаанаас мэдэх боломжтой вэ?

- Банкууд болон Халамжийн хэлтсээс мэдээлэл авч болно.