УИХ дахь “Шударга ёс” эвслийн бүлэг дөнгөж сая хуралдаж дууслаа. Эвслийн бүлгийн хуралдаанд МАХН-ын дарга Н.Энхбаяр оролцсон бөгөөд зургаан сайдыг томилох асуудлыг яаралтай шийдвэрлэх ёстой гэсэн шийдвэрийг гаргажээ.

Мөн хуралдаанаас “Шударга ёс” эвслийн бүлэг болон АН-ын бүлгийн хамтарсан ажлын хэсгийг байгуулах шийдвэр гаргажээ. Ажлын хэсэг шинээр томилогдох зургаан сайдын талаар саналаа нэгтгэх бөгөөд "Шударга ёс" эвслийн бүлгийн ажлын хэсгийн ахлагчаар Н.Энхбаяр ажиллах юм байна.

Энэ талаар эвслийн бүлгийн дарга Н.Батцэрэг хэлэхдээ “АН болон эвслийн бүлгийн хамтарсан ажлын хэсэг байгуулах шийдвэр гаргалаа. Энэ ажлын хэсэг Засгийн газрын шинэ гишүүдийн талаар санал солилцож байр сууриа нэгтгэнэ. Засгийн газрын асуудлыг яаралтай шийдэх ёстой учраас өнөө маргаашдаа багтааж ажлын хэсэг дүгнэлтээ гаргана” гэлээ.