Монгол Улс өнөөдрийн байдлаар хэрэглэж буй цахилгаан эрчим хүчнийхээ 20 орчим хувийг ОХУ, Хятад улсаас авдаг, мөн түүнчлэн хэрэглэгчдийн зарцуулж буй цахилгаан, дулааны үнийг төрөөс зохицуулж ирсний улмаас станцууд, дамжуулах түгээх станц алдагдалтай ажилласаар иржээ. Салбарын сайдын мэдээлснээр өнөөдрийн байдлаар 144 төгрөгийн өртөгтэй цахилгааныг 122 төгрөгөөр борлуулж, 1 квт цаг тутамд 22 төгрөгийн алдагдал хүлээдэг аж. Өнгөрсөн оны байдлаар энэ салбар 68.5 тэрбум төгрөгийн алдагдалтай ажиллажээ. Нөхцөл байдал ийм байгаа тул эрчим хүчний үнэ ханшийг үе шаттайгаар нэмэхээс өөр аргагүйд хүрчээ.