Өнөөдөр Цэдэнбалын академиас Нам төрийн нэрт зүтгэлтэн Ю.Цэдэнбал агсныг цагаатгах комиссын дүгнэлтэй холбоотойгоор мэдээлэл хийв. Тус холбооны тэргүүн доктор, профессор Ц.Жамбалсүрэн “Монгол Улсын Хөдөлмөрийн баатар  Маршал Ю.Цэдэнбалын мэндэлсний 100 жилийн ойг  манай академиас 2016 онд тэмдэглэн өнгөрүүлэх юм. Манай академиас энэхүү ажлын хүрээнд гаргасан шийдвэр, зохион байгуулж байгаа ажлынхаа  явцын талаар Монголынхоо ард түмэнд хүргэхийг зорилоо” гэв. Тус академиас Маршал Ю.Цэдэнбалын ойд зориулж хэд хэдэн ном товхимол болон баримтат кино зэргийг бүтээж олны хүртээл болгосон байна. Түүнчлэн Ю.Цэдэнбалыг улс төрийн талаар хэлмэгдүүлсэн тухай асуудлаар өнгөрсөн жил УИХ-ын дэд дарга Р.Цогт албан ёсоор хандсаныг хүлээн авч 10 гаруй хуульчдын бүрэлдэхүүнтэйгээр ажилласан ажлын  дүгнэлтийг энэ үеэр танилцууллаа.