Нийслэлээс жил бүр мөнгө гаргаж явган хүний замыг засдаг. Энэ дагуу явган хүний замд байх харааны бэрхшээлтэй иргэдэд зориулсан замыг шинэчлэж засдаг ч хангалттай төвшинд хийгдэхгүй байгааг Хараагүйчүүдын холбооноос хэлж байна. Наад зах нь хараагүй хүнд зориулсан замыг 3-н эгнээ, 2 хүн зорчих  боломжтойгоор хийх ёстой. Гэтэл  үүнийг бэлэг тэмдгийн төдий нэг эгнээ шар өнгийн цементээр хийдэг байна. Мөн хараагүйчүүдэд зориулсан зам халтиргаа ихтэй байдаг нь хүндрэл болдог гэсэн юм. Тиймээс Монголын үндэсний хараагүйчүүдын холбооныхны зүгээс гудамж талбайд баригдах замын ажилд өөрсдийнх нь төлөөллийг оруулах хэрэгтэйг хэлсэн байна. Мөн зарим хэсэгт хараагүй хүн тэр бүр зорчдоггүй гэх шалтгаанаар зориулалтын зам хийдэггүй нь тэдний эрхийг зөрчиж байгаа гэж үзсэн юм.