Гаалийн холбооны орнуудад мах, махан бүтээгдэхүүн экспортлох эрх хүссэн найман компани шалгалтаар илэрсэн дутагдлаа арилгаж эхэлсэн талаар Мал, эмнэлэг үржлийн газраас мэдээллээ. Энэ удаагийн шалгалтанд нийт 12 үйлдвэр хамрагдсан бөгөөд үүнээс "Эрдмийт", "Преком" компаниуд ОХУ-д мах экспортлох зөвшөөрөл авсан бол хоёр компанид нь татгалзсан хариу өгчээ. Харин үлдсэн найман компанид махаа шулах, савлах орчны ариун цэврийг сайжруулах шаардлага тавьсан байна. Монгол улс одоогийн байдлаар ОХУ, БНХАУ, Вьетнам болон Кувейт улсуудад малын мах экспортолж эхэлсэн бөгөөд Япон улстай дулааны аргаар боловсруулсан мах экспортлох гэрээ байгуулсан байгаа ажээ. Энэ оны хоёрдугаар улирлын байдлаар нийт 14 компанид 12,3 мянган тонн мах экспортлох зөвшөөрлийг ҮХААЯ-аас олгосон байна.