"Монгол ташуур констракшн" компани Цагаан замаскны үйлдвэрээ өнгөрсөн баасан гарагт ашиглалтанд оруулжээ. Тус компанийн үйлдвэрлэх "Монгол гранд" цагаан замаск нь "921" стандартынх бөгөөд манай улсад оруулж ирдэг "821" стандартын цагаан замаскаас цавуулаг өндөртэй ажээ. Экспортыг дэмжих, импортыг орлох 888 төслийн хүрээнд Хөгжлийн банкнаас "Монгол ташуур констракшн"-д таван жилийн хугацаатай 250 сая төгрөгийн санхүүжилт олгосноор тус үйлдвэр ийнхүү Монголдоо цагаан замаск үйлдвэрлэдэг болжээ. Дээрх цагаан замаск нь импортын бүтээгдэхүүнээс үнийн хувьд хямд буюу 20 кг нь 7000 төгрөгөөр худалдаалагдах бөгөөд үйлдвэр өдөрт 80 тонн цагаан замаск үйлдвэрлэх хүчин чадалтай юм байна.