Нүүрсэн галлагаатай зуухны утааг багасгах төхөөрөмжийг 80 айлд туршиж байна
Байгаль орчин ногоон хөгжлийн яам, Агаарын бохирдлыг бууруулах Үндэсний хороо, Цэвэр агаар сан, Улаанбаатар цэвэр агаар төсөл, Нийслэлийн Агаарын чанарын алба зэрэг агаарын бохирдолтой холбогдох газрын хүмүүс “Japan flare” төслийн багийн ажилтай танилцлсан байна. Энэхүү төслийн хүрээнд Япон мэргэжилтнүүд нүүрсэн галлагаатай зуухны утааг багасгах төхөөрөмж болох “japan flare”-ийг зохион бүтээсэн бөгөөд одоогоор гэр хорооллын 80 өрхөд суурьлуулан, нэг сарын хугацаанд турших ажил хийгдэж байна. Энэхүү төхөөрөмжийг зуухны яндангийн хэсэгт суурьлуулах ба нүүрсний шаталтаас үүссэн утааг бүрэн шатаах зориулалттай. Уг төхөөрөмж нь цахилгаан халаагуур болон утааны хийн бохирдлыг шүүн нэвтрүүлэх шүүлтүүрээс бүрдэх бөгөөд гал ассанаас унтрах хүртэл хугацаанд бохирдлыг шүүнэ. Түүнчлэн ямар ч төрлийн зууханд суурьлуулах боломжтой юм байна .