"Эрдэнэс Тавантолгой" ХК-ийн бүрэн эрхт төлөөлөгч Ж.Ганбат цаг үеийн асуудлаар мэдээлэл өглөө.

Тэрээр энэ үеэр "Эрдэнэс Тавантолгой ХК-д Засгийн газраас өнгөрсөн 2022 оны 10 дугаар сарын 26-ны өдрөөс онцгой дэглэм тогтоогоод бүрэн эрхт төлөөлөгчөөр миний бие томилогдон ажилласан. Өнгөрсөн таван сарын хугацаанд бид 1,3 тэрбум ам.долларын үнэлгээтэй 13 сая тонн нүүрсийг борлуулж чадсан.

Бид борлуулалтыг өмнөх үеэс 4,1 дахин, тээврийг 3,9 дахин экспортыг 2 дахин, орлогыг 3,9 дахин, олборлолтыг 2,7 дахин тус тус нэмэгдүүлээд байна. 2023 оны 01 дүгээр сарын 01-ний өдрөөс өнөөдрийг хүртэлх хугацаанд бид 765,2 сая долларын үнэлгээтэй 7,5 сая тонн нүүрсийг борлууллаа. Үүнээс 416 мянган тонн нүүрсийг 7 удаагийн арилжаагаар хөрөнгийн бирж дээр цахимаар арилжсан. Анх удаа 200 мянган тонн эрчим хүчний нүүрсийг арилжсан. Өмнө нь 9-10 ам.доллараар зарагддаг байсан эрчим хүчний нүүрсийг бид 70 гаруй ам.доллараар арилжиж үзлээ. Цаашид энэ үнийг нэмж явна. Үүнээс гадна сайн чанарын кокосжсон нүүрс өмнө нь 110-115 доллараар зарагддаг байсан бол одоо 180 гаруй ам.доллараар зарж байна. Нүүрсний арилжаагаар 20,9 сая ам.долларыг олсон. 

Үүнээс гадна өнгөрсөн таван сарын хугацаанд Монгол Улсын вальютын нөөцөд 900 гаруй тэрбум ам.долларыг нийлүүлсэн. Мөн өмнө нь авсан байсан 603 сая ам.долларын өрнөөс 180 сая гаруй ам.долларын өр л үлдээд байна. 

2023 оны 01 дүгээр улирлын байдлаар 7,3 сая тонн нүүрсийг борлуулж чадсан юм чинь он дуустал 30 орчим сая тонн нүүрсийг дангаараа борлуулах бүрэн боломжтой гэж харж байна.

Намайг нүүрсний хулгайтай холбож мэдээлэл цацсан. Энэ нь буруу ташаа мэдээлэл. Манай компани үндэсний компаниудаа дэмжих зорилготой ажиллаж байна. " гэдгийг онцоллоо. 

ШУУД ҮЗЭХ: