"Наран Мандал Энтерпрайзес" ХХК нь компанийн тамирчид болох МУГТ, Хөдөлмөрийн баатар, XXХII Токио 2020 олимпын наадмын хүрэл медальт М. Уранцэцэг (Urnaa Munkhbat), ОУХМ, XXХII Токио 2020 олимпын наадмын хүрэл медальт Ц. Цогтбаатар (Tsend-Ochir Tsogtbaatar), МУГТ Г. Одбаяр (Ganbaatar Odbayar) болон МУГТ Д. Амартүвшин (Dashdavaa Amartuvshin) нарыг уурхай дээрээ хүлээн авч хүндэтгэл үзүүллээ. Тамирчид уурхайн үйл ажиллагаатай танилцаж, ажилтнуудтай нэг өдрийг хөгжилтэй өнгөрөөлөө. 

Наран Мандал компанийн тамирчид болох Токио 2020 зуны Олимпын наадамд амжилттай оролцсон МУГТ, Хөдөлмөрийн баатар М. Уранцэцэг болон ОУХМ Ц. Цогтбаатар нарт “Наран Мандал Энтерпрайзес” ХХК-ны зүгээс тус бүр 80 сая төгрөгөөр урамшуулсныг хамт олныхоо хамт гардуулан өглөө.

Мөн Г. Одбаяр болон Д. Амартүвшинд цаашдын тэмцээнд амжилт хүсэж тамирчин бүрд 15 сая төгрөг гардуулж өгөв.

Тамирчиддаа дараа дараагийн тэмцээн уралдаанд амжилт хүсэж Монгол улсын төрийн далбааг Олимпын тэнгэрт дахин дахин мандуулахын ерөөлийг дэвшүүлье!