Увс аймгийн Малчин суманд айлын хотонд ойртож, эд хөрөнгөд хохирол учруулан, улмаар иргэдийн аюулгүй байдалд эрсдэл үүсгэсэн баавгайг агнасан гэж Увс аймгийн ЗДТГ-аас мэдээлэв.

Малчин сумын нутагт баавгай айлын хотонд орж, гэрийн эзэд машиндаа нуугдах үед дайрч, машиныг эвдсэн талаар мэдээлсэн юм. Тэгвэл өчигдөр 15:00 цагийн үед айлын хотонд орж ирсэн уг баавгайг агнасан байна.

Байгаль орчин, уур амьсгалын өөрчлөлтийн яамнаас Увс аймгийн Байгаль орчны газарт хүргүүлсэн албан бичигт:

- нэг нас хүрээгүй бамбарууш болон бамбарууш дагуулсан эм баавгайг агнахгүй байх;

- агнасан баавгайгаас идэш тэжээлийн нөхцөл байдлын судалгааны дээж авах, морфологийн хэмжилт хийх, холбогдох акт үйлдэх;

- хүрэн баавгай орж ирж буй байршил, чиглэлийг тогтоож, мониторинг хийх;

- хууль бус агнуураас урьдчилан сэргийлэх;

- баавгайг суурьшлын бүс рүү дахин орж ирэхээс сэргийлэх;

- үндсэн тархац нутагт нь биотехникийн арга хэмжээ зохион байгуулах чиглэл өгсөн байна. Мөн авсан арга хэмжээний талаарх тайлан, мэдээллийг долоо хоног бүр ирүүлэхийг үүрэг болгожээ