Аливаа нутаг дэвсгэрт амар тайван тогтож, ард иргэд нь амгалан амьдарч гэмээнэ тухайн бүс нутгийн ажил үйлс ч өөдрөг байдаг. Тиймээс Хөвсгөл аймгийн Засаг дарга Л.Төмөрбаатар аймгийнхаа Цагдаагийн газрын ажил байдалтай танилцаж, тулгамдаж буй асуудлыг шийдвэрлэхээр боллоо. Ингэхдээ Л.Төмөрбаатар дарга Монгол ёсоор ганзага хоосон очсонгүй, Цагдаагийн газарт "Приус-30" маркийн автомашиныг гардуулан өглөө.

Аймгийн Засаг дарга ард иргэдийнхээ амар тайван байдал юуны өмнө чухал учраас Цагдаагийнхаа байгууллагын үйл ажиллагааг бэхжүүлэх, алба хаагчдынхаа ахуй хангамжид анхаарч ажиллахаа илэрхийлсэн. Тиймдээ ч Цагдаагийн газрын төв байрыг шинээр барих асуудлыг улсын төсөвт тусгуулах, жолооны үнэмлэх хэвлэх киосик машин олгох, гэмт хэрэг, зөрчлөөс урьдчилан сэргийлэх, албан хаагчдын ажиллах орчин нөхцөлийг сайжруулах зорилгоор суудлын гурван автомашин, тоног төхөөрөмжүүдийг олгох зэргийг шийдвэрлэж ажиллахаа цагдаагийнханд дуулгав.

Үүнээс гадна Цагдаагийн газрын төв байрны халаалтын их засварын зардлыг шийдвэрлэхэд анхаарах, сумдын цагдаагийн кабоныг шинээр барих, засварлах ажилд дэмжлэг үзүүлэх, гэмт хэрэг, зөрчлөөс урьдчилан сэргийлэх зөвлөмж мэдээллийг иргэдэд хүргэх зорилгоор LED дэлгэцийг шийдвэрлэхэд анхаарах зэрэг олон асуудлыг шийдвэрлэхээр болсон нь цагдаагийн алба хаагчдын ажиллах урам зоригийг сэргээлээ.

Мөн үеэр цагдаагийн алба хаагчид “Манайд алба хаагчдын тоо цөөн, ажлын ачаалал их байна. Цагдаагийн газрын хэмжээнд бүтэц орон тоогоор ажиллах хэрэгтэй байгаа”-г Засаг даргадаа дуулгасан юм. Харин аймгийн Засаг дарга Л.Төмөрбаатар, Хууль, эрх зүйн хэлтсийн дарга Р.Машбатын хамт хүрэлцэн очсон учраас Хууль сахиулах болон төрийн цэргийн байгууллагуудын үйл ажиллагааг бодитой дэмжиж, байгууллагаас барьж байгаа бодлого шийдвэр, зохион байгуулж байгаа ажил, арга хэмжээг дэмжих, алба хаагчдыг үүрэг гүйцэтгэх нөхцөл боломжоор хангаж, тулгамдаж байгаа асуудлуудыг үе шаттайгаар шийдвэрлэхээ илэрхийлсэн юм.