Цахим сүлжээнд өчигдөр (2024.12.23) сурагчийг алгадаж, өшиглөж буй багшийн бичлэг цацагджээ.

Эл явдал Архангай аймагт болсон бөгөөд Архангай аймгийн цагдаагийн газраас тухайн багшийг шалгаж эхэлсэн байна.

Энэ талаар тус аймгийн Боловсролын газраас тодруулахад, "Сурагчаа зодсон асуудал өчигдөр аймгийн ерөнхий боловсролын 2-р сургууль дээр гарсан байна. Бид энэ талаар яг одоо хуралдаж байна. Удахгүй мэдээлэл өгнө." гэв.

Мөн энэ талаар 2-р сургуулийн захирал н.Гэрэлчулуунаас тодруулахад, "Манай сургуулийн 3-р ангийн багш хүүхдээ зодсон гэх асуудал өчигдөр буюу 2024 оны 12 дугаар сарын 23-ны өдөр болсон байна. Зодуулсан гэх хүүхдийн эцэг, эх нь цагдаагийн байгууллагад хандсанаар тухайн багшийг шалгаж байна.

Багшийн хувьд манай сургуульд 9 жил ажиллаж байсан туршлагатай багш байгаа. Ийм явдал гаргасанд харамсаж байна. Өмнө ийм асуудал гарч байгаагүй. Тухайн багшийн зэргийг хэлэх боломжгүй байна.

Сургуулийн зүгээс Ёс зүйн дэд хороо хуралдаж, багшийн ёс зүйн дүрмийн дагуу арга хэмжээ авах болно" гэв.

Эрүүгийн хуулийн 16.7 дугаар зүйл.Хүүхэдтэй хэрцгий харьцах                                               2.Энэ гэмт хэргийг багш, сурган хүмүүжүүлэгч, асран хамгаалах үүрэг хүлээсэн хүн үйлдсэн бол дөрвөн зуун тавин нэгжээс хоёр мянга долоон зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас зургаан сар хүртэл хугацаагаар зорчих эрхийг хязгаарлах ял шийтгэнэ.