Өвөрхангай аймаг, Хархорин сумын нутагт суудлын автомашинууд мөргөлдөж хоёр хүн тээврийн хэрэгслийн эд, ангид хавчуулагдсан байна гэсэн дуудлага өчигдөр буюу энэ сарын 12-ны өдрийн 11:40 цагт Онцгой байдлын албанд иржээ.

Тус аймгийн Онцгой байдлын газрын Гал түймэр унтраах, аврах 45 дугаар ангийн алба хаагчдыг очиход Архангай аймгийн Өндөр-Улаан сумаас Улаанбаатар хотын чиглэлд зорчиж явсан "Королла Румион" загварын суудлын автомашин, "Коррола" загварын суудлын автомашинтай мөргөлдсөн.

Автомашины эд ангид 67 настай иргэн хавчуулагдаж нас барсан байсныг 60 минут ажиллаж цогцсыг гарган Хархорин сумын сум дундын Цагдаагийн хэлтэст, хүнд гэмтэж бэртсэн 1 зорчигчийг сум дундын Эмнэлгийн яаралтай тусламжийн эмчид хүлээлгэн өгөв.