Хөвсгөл аймгийн Арбулаг сумын Цагаан нуурын мөс цөмөрч “Супер-Пронтер” загварын ачааны автомашинтай зорчиж явсан иргэд тус нууранд суусан байна. Хоёр зорчигч автомашиныхаа тэвшин дээр байсан бол нэг хүн нь усанд осолдож, амиа алджээ. 

Энэ тухай дуудлагыг арваннэгдүгээр сарын 8-ны 01:58 цагт холбогдох албаныхан хүлээн авсан байна. Дуудлагын дагуу тус сум дахь Цагдаагийн хэсгийн алба хаагчид, орон нутгийн иргэд арваннэгдүгээр сарын 8-ны 02:30 цагт очиход тус автомашины жолооч Г /39 настай, эрэгтэй, Мөрөн сумын харьяат/, зорчигч Д /43 настай, эрэгтэй, Арбулаг сумын харьяат/ нарыг эсэн мэнд аюулгүй газарт гаргаж, тус сумын Эрүүл мэндийн төвд хүлээлгэн өгсөн байна.

Харин осолдсон иргэн Б /30 настай, эрэгтэй/-ыг эрэн хайх ажиллагааг зохион байгуулж, арваннэгдүгээр сарын 8-ны 10:40 цагт нуурын хоёр метрийн гүнээс цогцсыг олж, тус сум дахь Цагдаагийн хэсгийн мөрдөгчид шилжүүлэн өгчээ.