Улсын онцгой комиссын дэргэдэх Эрдэмтдийн зөвлөлөөс шөнийн хатуу хөл, хорио тогтоох саналыг Засгийн газарт хүргүүлсэн. Тодруулбал, шөнийн 22.00 цагаас эхлэн хатуу хөл, хорио тогтоож үйлчилгээ, цэнгээний газруудыг хаах ёстой гэж үзэж буй юм. 

Тэгвэл шөнийн хөл хорио тогтоож халдварыг хумьсан Баян-Өлгий аймгийн засаг дарга Д.Бауыржан туршлагаа хуваалцжээ.

Тэрбээр "Наймдугаар сарын эхээр өдөрт бүртгэгдэх халдварын тохиолдол 500-д хүрсэн. Тиймээс ХӨСҮТ-д хандаж, зөвлөгөө авч шөнөөр хөл хорих шийдвэр гаргасан. Манайх 19 цагаас өглөөний 07 цаг хүртэл хөдөлгөөнийг бүрэн хязгаарласан. Мөн гаднаас хүн авахгүй, аймаг, хот руу гарахыг зөвшөөрсөн. 22 цаг хүртэл ШТС, эмнэлэг, хүнсний дэлгүүр ажилласан. Энэ хугацаанд төрийн албан хаагчдыг 30 хувиар ажлуулсан. Хөл хорихоос өмнө эмнэлгүүдийн ачаалал нэмэгдэж, орны хүрэлцээ тааруу байсан. Манай аймаг үндсэндээ 380 ор дэлгэсэн. Тэгсэн ч тухайн үед хүндэрсэн хүн их байсан учраас эмнэлэг ачаалал их байсан.

Хөл хорио тавьсан эхний гурав хоногт ард иргэд эсэргүүцэж хүлээн авсан. Гэхдээ дараагийн өдрүүдээс ард иргэд ч хүлээн зөвшөөрч, сахилга баттай байсанд талархаж байгаа. Үүний дүнд өдөрт 300-400 хүртэл бүртгэгдэж байсан халдварын тохиолдлыг арав хоногт илт бууруулж чадсан.

Наймдугаар сарын 25-наас хойш өдөрт 120, 180, 80, 50 гэх мэт тохиолдлууд илэрч байна. Өчигдөр гэхэд манай аймагт шинээр халдварын  тохиолдол бүртгэгдээгүй байна" гэв.