Баян-Өлгий аймгийн Цэнгэл сумын 7 дугаар багийн нутаг “Цагаан гол”-ын мөсөн дээгүүр мотоцикльтой зорчиж явсан хоёр иргэн мөс цөмөрсний улмаас осолдож, иргэн Г нь /35 настай, эрэгтэй/ мөсөн доогуур ороод алга болсон золгүй хэрэг гарчээ. Энэ тухай дуудлагыг өчигдөр өдрийн 19:30 цагт тус аймгийн Онцгой байдлын хэлтэс хүлээн авч найман албан хаагч, нэг техник хэрэгсэлтэйгээр эрэн хайх ажиллагааг зохион байгуулж байгаа ч одоогоор цогцсыг олоогүй байна. Дашрамд дурдахад нийт нутгаар огцом дулаарч гол, нуурын мөс нимгэрсэн тул зам товчлох гэж аюултай эрсдэл гаргалгүй гүүр, гармаар гарахыг жолооч нарт анхааруулъя.