Худгийн усан дахь хүнд металлын хэмжээ ихэсчээ
Дорноговь аймгийн Сайншанд сумын Зүүнбаян багийн иргэдийн ундандаа хэрэглэдэг зарим худгийн ус эрүүл ахуйн хувьд шаардлага хангахгүй болжээ. Тус багаас зүүн хойш 20 км зайтай орших Хөх усны худгаас аймгийн Мэргэжлийн хяналтын газрын байцаагч энэ онд дээж аван шинжлэхэд хүнд металлын агууламж нь ихэссэн байсан тул унданд хэрэглэж болохгүй гэсэн дүгнэлт гаргасан байна. Байгаль орчны зарим төрийн бус байгууллагынхан үүнд Зүүнбаянгаас нефть олборлодог БНХАУ-ын хөрөнгө оруулалттай “Доншен” компани, Улаанбадрах суманд ураны урьдчилсан хайгуул хийж дуусаад байгаа “Кожеговь” компанийг сэрдэж буй аж.
Гүний усыг хүний эрүүл мэндэд аюулгүй болгохын тулд ундарга дээр нь цэвэрлэх төхөөрөмж суурилуулах шаардлагатай аж. Энэ талаар мэргэжлийн байгууллагаар дүгнэлт гаргуулж, аймгийн ИТХ-д хандан цэвэрлэх төхөөрөмж авах хөрөнгө мөнгөний асуудлыг шийдвэрлүүлэх юм байна.