Өнгөрсөн амралтын өдрүүдэд сэтгүүл зүйн салбараас төрөн гарсан Соёлын гавьяатууд Дархан-Уул аймагт чууллаа. Тэднийг ийнхүү нэг дор цуглуулах ажлыг МСЭ-ийн Дархан салбараас зохион байгуулсан юм. Анх удаа болж байгаа энэхүү үйл ажиллагааг Дархан салбарын тэргүүн М.Гантулга санаачилж, УИХ-ын гишүүн Д.Хаянхярваа дэмжиж, Дархан сумын  ЗДТГ, Дархан-Ус суваг компани зэрэг байгууллагууд хамтран зохион байгуулжээ.

   Зуу илүү жилийн түүхтэй энэ салбараас нийтдээ 100 орчим гавъяат төрсөн бөгөөд өдгөө 60 орчим нь амьд сэрүүн, уран бүтээлээ уншигч, үзэгч, сонсогчиддоо хүргэсээр явна. Энэ удаад эдгээр эрхэм хүмүүсээс биеийн байдал, ажил төрлөөс шалтгаалан 18 Соёлын гавьяат зүтгэлтэн оролцлоо.

СГЗ Д.Амбасэлмаа, Х.Цэвлээ, Л.Гүнсэн, Б.Галаарид, Т.Баасансүрэн, М.Шийрэв, Г.Чулуунбат, н.Даариймаа, Б.Пүрэвдаш, Д.Шагдарсүрэн, Ш.Ёолк, Л.Золжаргал, С.Зэвсэг, Б.Дашзэвэг, Санж.Пүрэв, Ө.Рагчаасүрэн, Т.Бямбадорж, н.Монголхүү гээд нэрийг нь сонсонгуут л уран бүтээл нь нүднээ тодорч, сэтгэлд ургадаг эрхмүүд ийнхүү нэг дор цуглав. Тэднийг салбарынхаа бурхадууд хэмээн авгайлдаг бөлгөө.

Дархан хот анх 1961 онд байгуулагдсан бөгөөд 1963 онд СГЗ Х.Цэвлээ гуай Дарханы Сангийн аж ахуйд оюутан байхдаа ажиллахаар ирж байсан бол Д.Амбасэлмаа гуай Дархан хотын Хувьсгалт залуучуудын эвлэлд ажиллаж байжээ.

Тэд энэ талаараа Залуучууд театрт болсон “Ган үзэгтэн” уулзалтын тайзан дээрээс хуучилсан юм. Тус уулзалтад Хүмүүнлэгийн ухааны сургуулийн Дархан салбарын сэтгүүл зүйн ангийн оюутнууд, өсвөрийн сэтгүүлчид оролцож, гавьяатуудаас сонирхсон асуултдаа хариулт авсан нь тэдний хувьд маш гайхалтай зүйл байлаа.

“Зурагтаар л хардаг ийм мундаг хүмүүсийг нэг дор харсан нь гайхалтай хэрэг байлаа” хэмээн нэг оюутан охин хэлсэн нь юутай үнэн. Учир нь үүнийг бичиглэгч сэтгүүлч миний бие ч гэсэн эдгээр хүмүүсийг нэг дор цугласан байхыг нь хараагүй билээ. Мөн уулзалтад оролцогч хүүхэд багачууд болон гавъяатуудын санал нэгдэн эмзэглэж байсан нэг зүйл бол дунд сургуулийн хичээлийн програмаас монгол хэл, уран зохиол, Түүхийн хичээлийн цагийг багасгасан явдал байлаа.

Энэхүү уулзалтын үеэр СНЭ-ийн "Ган үзэгтэн" шагналаар Дархан-Уул аймагт ажилладаг дөрвөн сэтгүүлчийг шагнасан юм. Ийнхүү уулзалт өндөрлөж, залуу насных дурсамжуудтай ямар нэгэн сэжимээр холбогдсон Дарханчуудын тухай дурсан ярьсан тэдэнтэй маань дурсгалын зураг авхуулах гэсэн урт дараалал үүсчээ. Цаг нартай уулзалт тул яах аргагүй өндөрлүүлээд, цагдаагийн машинаар газарчлуулсан бид автобусандаа суун дараагийн үйл ажиллагааг зорин хөдөллөө. Энэ нь Дархан зочид буудалд болох Дархан-Уул аймгийн сэтгүүлчдийн “Шилдэг сэтгүүлч-2014” юм. Энэ жилийн шилдгийн шилдэг сэтгүүлчээр DBS телевизийн сэтгүүлч Б.Тэгшдэлгэр шалгарлаа.   

Залуучуудын гэх тодотголтой Дархан хотод нэгэн үдшийг залуу сэтгүүлчидтэйгээ хамт өнгөрүүлсэн Соёлын гавъяатууд маань залуу насандаа эргэн очсон мэт догдлон хөөрч байсан тэд маань Улаанбаатар төмөр замын буудлаас биедээ хоргодон хоргодсоор гэр гэрийн зүг хөдөллөө. Сэтгүүл зүйн салбартаа хагас зуу, бүтэн жарнаар тоологдох он цагийг өнгөрөөж, нэг насны амьдралаа зориулж ирсэн тэдэндээ нийт уншигчдынхаа өмнөөс хамгийн сайн сайхан, эрүүл энхийг хүсэн ерөөе өө.