ОХУ-ын Буриад Улсын Эрүүл Мэндийн салбарын төлөөлөл ХӨСҮТ-д ажиллав.

Айлчлалын бүрэлдэхүүнд Буриад Улсын Эрүүл мэндийн яамны зохион байгуулалтын ажлын хэлтсийн дарга Раднаева Ирина Элбековнагийн удирдсан Буриадын Эрүүл Мэндийн салбарын төлөөллүүд оролцож байна.

ХӨСҮТ-ийн Тандалт сэргийлэлт эрхэлсэн дэд захирал А.Азжаргал, Эмнэлгийн тусламж үйлчилгээ хариуцсан дэд захирал Б.Саруул болон холбогдох албадын төлөөлөл уулзалтад оролцлоо. Уулзалтаар хоёр тал Гепатит Д вирусын эмчилгээ, Сүрьеэгийн чиглэлээр хамтын ажиллагаа зохион байгуулах, шимэгч судлалын чиглэлээр түүн дотроо хачгийн оношилгоо, эмчилгээний чиглэлээр хамтран ажиллаж байгаа талаараа ярилцлаа.

Буриадын төлөөлөгчид ДОХ-ын урьдчилан сэргийлэлт ба оношилгоо эмчилгээ, Гепатит Д вирусын эмчилгээний чиглэлээр харилцан туршлага солилцох, Хачгийн вакцинжуулалт ба Тарваган тахлын вакцинжуулалтын чиглэлд улам илүү хамтран ажиллах сонирхолтой байгаагаа илэрхийллээ.