Улсын нэгдүгээр төв эмнэлэг 2025 оны 10 дугаар сарын 20-ны өдөр ууган эмнэлгийнхээ түүхт 100 жилийн ойд зориулан нэгэн зууны түүхийг хамтдаа бичилцсэн үе үеийн удирдлагуудаа хүлээн авч, хүндэтгэл үзүүлэх ёслолын арга хэмжээ боллоо.

Тус үйл ажиллагаанд УНТЭ-ийн Ерөнхий захирал Л.Бямбасүрэн "Бидний урилгыг хүлээн авч, хүрэлцэн ирсэн эмнэлгийн үе үеийн удирдлагууд, дэлхийн дэвшилтэт технологийг амжилттай нэвтрүүлж буй эрдэмтэд, профессорууд, эрхтэн шилжүүлэн суулгах багийнхаа хамт олондоо баярлалаа. Түүхт 100 жилийн хугацаанд эмнэлзүйн болон бусад чиглэлээр ЭМЯ болон бусад байгууллагуудтайгаа хамтран ажиллаж, Нэгдүгээр эмнэлгийнхээ анхдагч, манлайлагч гэдэг нэр хүндийг хамгаалж ирсэн үе үеийн удирдлагууддаа талархал илэрхийлье. 

УНТЭ-т ажиллаж буй үе үеийн эмч, мэргэжилтнүүдийг төр засгаас үнэлж, Хөдөлмөрийн баатар цолоор 4 эмч, Ардын эмч цолоор 13 эмч, Төрийн соёрхолт зургаан баг, гавьяат эмч 68 төрөн гарсан нь бидний хөдөлмөрийн үнэ цэнийг харуулж байна. Бид цаашид орчин үетэйгээ хөл нийлүүлэн алхах зорилгоор эмнэлгийнхээ үйл ажиллагаанд AI тоног, төхөөрөмжийг нэвтрүүлэх зорилт тавин ажиллаж, эхний ажлаа амжилттай хийсэн. Энэ бол эмийн ухаалаг системийг ашиглалтад оруулж, “Эрүүл мэндийн технологи-2025” олон улсын үзэсгэлэнд амжилттай оролцож ШИЛДЭГ БАЙГУУЛЛАГААР шалгарсан." гэдгийг энэ үеэр онцоллоо. 

Монгол Улсын төрийн шагналт, хүний гавьяат эмч, АУ-ны доктор, Клиникийн профессор Л.Жамбалжав:

УНТЭ бол салбартаа анхдагч, манлайлагч эмнэлэг. 100 жилийн хугацаанд Монгол Улсын эрүүл мэндийн салбарын бүх л хүмүүс УНТЭ-ээр дамжин суралцаж, хүмүүжиж, туршлага олж, өвчтөнийг эмчилдэг болсон. 100 жилийн ойг тохиолдуулан олон арга хэмжээг зохион байгуулж байна. Миний бие багийнхантайгаа хамт бөөр шилжүүлэн суулгах мэс заслыг Монгол Улсад амжилттай нэвтрүүлсэн. 

Хамт олон маань эрхтэн шилжүүлэн суулгах мэс заслыг эмнэлэгтээ нэвтрүүлж, эмнэлгийнхээ 100 жилийн ойдоо бахархам сайхан түүхээ бүтээлцэж яваадаа үргэлж талархдаг. Түүхт 100 жилийн ойг бүтээлцсэн хамт олондоо баярын мэнд хүргэе.