Төрийн Тусгай албан хаагчдын нэгдсэн эмнэлгийн захирал Н.Одонгуа байгууллагынхаа түргэний машиныг хувьдаа ашиглаж, Дундговь аймаг руу найзуудтайгаа зугаалахаар явж байгаад машин нь эвдэрчээ. 

Тодруулбал, энэ сарын 10-ны өдөр буюу баасан гарагт ТТАХНЭ-ийн захирал Н.Одонгуа нь түргэний тэрэгтэйгээ хэд хэдэн найзыгаа аваад Дундговь аймаг руу хөдөлсөн байна. Замдаа явж байгаад түргэний машин нь эвдрээд, жолоочтой нь  үлдээгээд өөр машин дуудан цааш хөдөлсөн гэх мэдээлэл байна. Уг асуудлыг ихэд нууцалсан боловч өнөөдөр буюу 13-ны даваа гарагт тус түргэний машин дуудлагад гараагүй, 48 цаг холбоо сураггүй таг байгаа аж. 

Н.Одонгуагийн хувьд Л.Оюун-Эрдэнийн хамтарсан засаг гарах үед ХҮН намын томилгооны квотод орж ирж ажиллаж буй нэгэн. Тэрбээр жил гаруйн хугацаанд эмч, эмнэлгийн ажилтнууддаа шудрага бус шийдвэр гаргаж, ялгаварлан гадуурхдаг хэмээн шүүмжлэлд өртөөд буй. Тус эмнэлгийн ажилчид Н.Одонгуагийн эсрэг өргөдөл гаргаж, харьяа яамдуудад өгөхөөр бэлдэж буй аж. 

Н.Одонгуа нь энгийн өдрүүдэд  ч албаны буюу түргэний машинаар хувийн ажлаа амжуулахаас гадна удаа дараа энэ талаар болохгүй гэж сануулсан боловч, ёс зүйгүй загнасаар байгаа талаар ажилчид нь хэлж байв.