Улсын Нэгдүгээр төв эмнэлгийн түүхт 100 жилийн ой энэ онд тохиож буй. Тус ойгоо угтан эмнэлгийн хамт олны зүгээс эмнэлгийн орчинг засч сайжруулах, иргэдэд тав тухтай орчинд үйлчлэх зорилгоор олон ажлыг эхлүүлээд байна. 

УНТЭ-ийн тасаг, нэгжүүд 100 жилийн ойн арга хэмжээний хүрээнд уриалга гаргаж, өөрсдийн нөөц боломжоор тасгаа засварлах, тоног төхөөрөмж авах, тохижуулах ажлыг эхлүүлээд байна.

Үүний нэг болох УНТЭ-ийн Нүд судлалын тасгийн хамт олон өөрсдөө 30 сая төгрөгийн хуримтлал үүсгэж, шаардлагатай тоног төхөөрөмж авах, тасгаа шинэчлэх ажлыг хийж дуусгажээ. Ингэснээр иргэд тав тухтай орчинд үйлчлүүлэх, эмч, мэргэжилтнүүд тухтай орчинд ажиллах боломж бүрджээ.

Тус тасагт энэ онд улсын төсвийн хөрөнгө оруулалтаар дотор засвар хийгдсэн бөгөөд ийнхүү иж бүрэн засвар хийгдсэнээр эмч, мэргэжилтнүүд тав тухтай орчинд ажиллаж, иргэдэд чанартай тусламж, үйлчилгээг үзүүлж байна. 

Засвар хийгдэхээс өмнө нүдний тасгийн эмч, мэргэжилтнүүд нэг өрөөнд үзлэг, оношилгоо, мэс заслын боолт хийж иргэдэд үйлчилдэг байсан бол тасаг бүрэн шинэчлэгдсэнээр зургаан цонхоор үйлчилгээ үзүүлэх боломж бүрдсэн талаар УНТЭ-ийн Нүд судлалын тасгийн Зөвлөх эмч  Б.Төмөрбаатар энэ үеэр онцолж байлаа.